Confesa que intoxicou á súa nai con metadona, pero non irá a prisión por iso
Por Oskar Viéitez & Cristina Saiz
O veciño de Cangas, Juan Carlos I.B. confesou este martes ante o tribunal da Sección Segunda da Audiencia de Pontevedra que intoxicou á súa nai dándolle metadona. Ademais recoñeceuse autor dun delito contra a saúde pública de sustancias que causan un grave dano á saúde de modo continuado.
O fiscal, Pablo Varela, pedía inicialmente 8 anos de prisión ao ter en conta o agravante de parentesco, pero tras un pacto coa avogada do acusado, a pena reduciuse quedando nun ano e nove meses. A razón de 1 ano e 6 meses polo delitos contra a saúde pública e 3 meses por un delito de lesións.
O acusado recoñeceu os feitos a cambio desta rebaixa na condena na que o representante do Ministerio Público tivo en conta as atenuantes de confesión e o consumo de drogas que lle ocasionou deterioración cognitiva que afecta á súa personalidade.
Juan Carlos admitiu que "con plena conciencia dos efectos que causaban" deulle metadona á súa nai. Foi uns días antes da festividade de Reis, no ano 2013 provocándolle lesións consistentes nun "cadro de intoxicación por tóxicos", segundo recolle o escrito de acusación.
A Fiscalía non contou coa declaración da vítima porque esta faleceu con posterioridade.
O Ministerio Público non solicitou multa para o acusado, en contra do habitual en delitos de drogas, ao non determinarse a valoración da metadona, pero si interesou a suspensión da pena para evitar que entre no cárcere, coa condición de que continúe cos tratamentos de rehabilitación por consumo de drogas e polo trastorno que sofre.