Un fallo eléctrico provoca un pequeno incendio na árbore de Nadal da Ferrería
Por Redacción
Vaia susto levaron os centos de pontevedreses que na tarde do sábado se encontraban na praza da Ferrería. Minutos antes das sete da tarde, a árbore de Nadal que ilumina dende hai case mes este emblemático espazo apagábase de súpeto. Un fallo no circuíto eléctrico dun dos paneis de luz provocou un pequeno incendio e a iluminación deixou de funcionar.
Apenas levaba arranque quince minutos, sinalan algunhas testemuñas. "No hubo explosión ni nada, es como si alguien apagase el interruptor. Y en ese momento empezó a verse algo de fuego y humo", explicou a PontevedraViva unha das mulleres que, nese momento, se encontraba cos seus fillos nesta céntrica praza pontevedresa.
Non tardaron en chegar varias unidades da Policía Local e dos Bombeiros. Mentres os primeiros estableceron un perímetro de seguridade para que a xente se mantivese afastada da árbore, unha dotación dos bombeiros subiu ata a zona do incendio para comprobar que acontecera coa iluminación. Foi un fallo nun dos transformadores, probablemente pola humidade, a que causou este incidente.
Os Bombeiros, tras revisar superficialmente o resto dos cadros de luz adxacentes, retiráronse cando, despois de comprobar que non había perigo ningún de que o lume se reactivase, os informaron de que técnicos da empresa encargada da iluminación do Nadal en Pontevedra estaban de camiño para solucionar a avaría.
Ao tratarse de paneis individuais de luz, a árbore púdose volver acender sen problema ao pouco tempo. Iso si, sen o cadro afectado polo incendio.
O suceso, que se produciu a unha hora na que había unha grande afluencia de xente polas rúas da cidade, atraeu a atención de numerosas persoas que se achegaron ata a praza da Ferrería para observar o sucedido.