Un condutor intenta degolar un garda civil nun control de tráfico en Poio
Por Oskar Viéitez
O xulgado de garda deixou en liberdade con cargos un condutor que na madrugada do pasado mércores intentou degolar un axente da Garda Civil que participaba nun control de tráfico. Impútanselle senllos delitos de atentado e contra a seguridade do tráfico.
Segundo fontes do Instituto Armado o suceso tivo lugar este mércores sobre as tres da madrugada nun control preventivo de tráfico instalado na PO-308, no termo municipal de Poio.
O condutor dun dos vehículos, ao que se deu o alto para a práctica da proba de alcoholemia, sorprendeu os axentes ao entrar no furgón de atestados esgrimindo un cutter.
O agresor abalanzouse sobre un dos funcionarios ao que intentou cortar no colo. A rápida reacción do garda civil evitou o mortal ataque, aínda que sufriu algúns cortes nas mans. O home foi reducido polos axentes que participaban no control.