O Sergas indemnizará por dano moral un pontevedrés ao que operaron no CHOP sen que conste permiso
Por Natalia Puga
O Servizo Galego de Saúde deberá indemnizar con 20.000 euros a un paciente pontevedrés de 30 anos polo dano moral que lle causaron dúas operacións de columna no Complexo Hospitalario de Pontevedra (CHOP) para as que non consta que asinase consentimento.
A condena impúxoa un xulgado do contencioso-administrativo de Santiago de Compostela ao considerar que o Sergas non conseguiu probar a existencia do consentimento informado para as citadas intervencións cirúrxicas.
O paciente denunciou no xulgado mala praxe, pero o xuíz non considerou probado que existise unha mala actuación dos profesionais sanitarios que atenderon ao paciente e a sentenza condena o Sergas por dano moral.
O avogado do Defensor do Paciente en Galicia, Cipriano Castreje, sostén que esa mala praxe non quedou probada porque o Servizo Galego de Saúde non achegou a totalidade da historia clínica do paciente. Esta documentación desapareceu no incendio da nave de Alba na que se destruíron 500.000 historias clínicas do CHOP no ano 2004 e falta a práctica totalidade do historial, en especial as follas cirúrxicas. Tampouco sobreviviu ningún outro documento relevante sobre o que un perito puidese facer unha análise que determine a correcta ou incorrecta praxe médica.
A historia clínica do paciente desapareceu no incendio do arquivo do CHOP
Os feitos que deron lugar a esta sentenza remóntanse ao ano 2003. O paciente Y. D. D., que entón tiña 30 anos, tiña lumbalxia e lumbociatalxia que non conseguía remitirse con outro tratamento, de modo que o operaron de hernia discal. Foi intervido polo Servizo de Traumatoloxía do CHOP e reintervido aos poucos días tras presentar no postoperatorio coxeira e adormecemento dos dedos do pé dereito.
Tras a nova intervención, non presentou melloría, continuou con dor intensa, necesitou tratamento paliativo para a dor e diagnosticóuselle unha enfermidade crónica, en concreto, "aracnoiditis crónica post-laminectomía".
En vista da nova situación, o paciente entendeu que a intervención lle xerou máis dano que o que presentaba previamente e que houbera mala praxe, ademais de non ser informado das posibles secuelas da operación. Tras acudir ao Defensor do Paciente, formulou demanda contra o Sergas.