Lores defende que "se constata" que Pontevedra "funciona cada vez mellor"
Por Alejandro Espiño
Con motivo do inicio do novo curso político, o alcalde de Pontevedra, Miguel Anxo Fernández Lores, destacou que o labor desenvolvido polo goberno municipal nos últimos meses fai que "se constate" que o Concello "funciona cada vez mellor".
Nun almorzo informativo celebrado no Cafetín, Fernández Lores destacou que, aínda que existen "certas disfuncións" das que asegura que "somos conscientes" e nas que se compromete a traballar, a cidade está a recibir un "novo impulso".
"Seguimos poñendo a Pontevedra no mapa e seguimos sendo unha referencia", subliñou o rexedor da capital, que mostrou o seu "orgullo" polo traballo de todos os funcionarios municipais para poder mellorar a capacidade de xestión e a iniciativa política do seu goberno.
A iso sumou a estreita colaboración con outras administracións e o "cambio de actitude" que percibe nos partidos da oposición, cos que Lores espera que "sigan nesa liña" de colaboración en cuestións que son "importantes" para Pontevedra.
Entre os retos que a Boa Vila debe abordar nun "futuro inmediato", o alcalde enumerou o novo contrato de residuos, a renaturalización do Gafos, a adxudicación do parque da Parda ou programación paralela dos Premios Feroz, entre outras actuacións.
Poñerse ao día coas subvencións deportivas, licitar a reforma de Rosalía de Castro e o novo vial de Mollavao, materializar a compra dos terreos para o novo edificio de emerxencias, impulsar o cambio a LED da iluminación do Burgo e Lérez ou deseñar un Nadal "familiar e especial" tamén figuran nas prioridades municipais para os próximos meses.
Ademais, o alcalde avanzou que "xa estamos traballando" no orzamento municipal de 2025, para o cal esperan coñecer en breve as "directrices" do Goberno central en materia de salarios e transferencias. A intención, dixo, é acordar as contas con PP e PSOE "por todas as vías", para acometer as actuacións "que sexan necesarias".
"PREOCUPADO" POR SANTA CLARA
Preguntado sobre o proxecto para a rehabilitación do convento de Santa Clara, Fernández Lores recoñeceu estar "preocupado" pola parálise que aprecia na súa tramitación, algo que achacou a que "van para adiante e para atrás" cos plans previstos.
"A ver se se centran un pouco e fan o que teñen que facer", sostivo o alcalde, que asegura que non se arrepinte de ceder a xestión do inmoble á Deputación porque o investimento necesario para a súa reforma "supera a capacidade do Concello".
Relacionadas:
-
Domínguez ve a Lores "frustrado" por Santa Clara e censura o seu "doble rasero"
Por Alejandro Espiño |
-
Unha delegación da cidade surcoreana de Suncheon estuda o 'Modelo Pontevedra'
Por Oskar Viéitez |
-
Lores rexeita a subida do canon de Sogama que custaría un millón e medio máis ao ano a Pontevedra: "É un auténtico sablazo"
Por Oskar Viéitez |
-
Darán "máxima axilidade" á licenza para a rehabilitación de Santa Clara, pendente de nova documentación
Por Natalia Puga |