O proxecto "Tecendo Redes" promove o intelecto e o benestar emocional dos adolescentes de Bueu
Por Redacción
O Concello de Bueu puxo en marcha durante este curso o proxecto piloto "Tecendo Redes", que se levou a cabo no IES Johan Carballeira da vila por parte do persoal técnico de Luzada Social, e no que se propuxeron intervencións na adolescencia.
Este innovador proxecto, que continuará en setembro, constou de dúas partes diferenciadas: intervencións individuais e colectivas, que consistiu nun obradoiro de formación en convivencia positiva para alumnado acompañante.
O obxectivo principal das intervencións individuais foi a identificación e abordaxe de posibles factores de risco individuais, sociais e ambientais, especialmente intensificados durante a adolescencia, etapa crucial para o desenvolvemento persoal.
En total realizáronse 15 intervencións individuais seguindo un enfoque sistémico, que permitiu identificar factores de risco a nivel persoal e no contorno de cada adolescente. Creouse un ambiente de escoita e apoio, establecendo un espazo seguro e adaptado ás necesidades de cada mozo, promovendo o seu benestar emocional. Nos casos en que foi necesario, impulsouse a cooperación entre pais, persoal educativo e servizos sociais, garantindo un apoio integral e cohesionado.
En canto á intervención colectiva, organizouse un Obradoiro de Formación en Convivencia Positiva. Cun grupo de 9 alumnos de 3º da ESO realizáronse 6 sesións semanais dunha hora. O "Alumnado Acompañante" actuou como axente prosocial no centro para favorecer a convivencia positiva, detectar conflitos, apoiar aos compañeiros e colaborar co profesorado para mellorar a convivencia no centro.
Os obxectivos deste obradoiro incluíron a formación na escoita activa e na resolución de conflitos, a promoción da detección precoz da angustia emocional e o fortalecemento da resiliencia, a empatía e a comunicación entre o alumnado.
O obradoiro de Convivencia Positiva conseguiu con eficacia os seus obxectivos, desenvolvendo nos participantes habilidades esenciais para a resolución de conflitos, a escoita activa e a empatía. O alumnado amosou un notable interese e compromiso coas actividades propostas, afirmando que o aprendido será moi útil no seu día a día, tanto dentro como fóra do instituto.
"Tecendo Redes" destaca polo seu enfoque holístico, coordinando esforzos entre o centro educativo e os Servizos Sociais. Reflicte o compromiso do Concello de Bueu, e do IES Johan Carballeira coa saúde mental e o desenvolvemento integral do seu alumnado, promovendo tanto o intelecto como o benestar emocional.
Este proxecto piloto supuxo un paso crucial para mellorar o apoio aos adolescentes, ofrecendo intervencións personalizadas e fomentando unha comunidade educativa máis unida e comprometida co benestar do seu alumnado.