"Acuérdate bien de la cara de las niñas, que es la última vez que las vas a ver", a ameaza dun home á súa esposa que acaba en condena
Por Natalia Puga
"Acuérdate bien de la cara de las niñas, que es la última vez que las vas a ver". Esta frase, que un home dirixiu á súa esposa na vivenda familiar diante das súas dúas fillas, valeulle unha condena como autor dun delito de ameazas leves no ámbito da violencia sobre a muller.
Dous órganos xudiciais diferentes, o Penal número 4 de Pontevedra e a sección cuarta da Audiencia Provincial, consideraron probado que pronunciou esa ameaza "coa intención de amedrentar o ánimo da muller, causándolle temor".
Segundo consideran probado, realizou esa ameaza en marzo de 2020, durante unha discusión na vivenda familiar, e en presenza das súas dúas fillas, unha delas menor de idade e nun contexto no que estaba sobre a mesa a separación da parella.
Ambos os xulgados impóñenlle 80 días de Traballos en Beneficio da Comunidade ou, alternativamente, 9 meses e un día de prisión.
Ademais, prívanlle do dereito á tenencia e porte de armas durante dous anos e un día e establecen unha orde de protección que lle prohibe aproximarse a menos de 500 metros da súa vítima e comunicarse con ela durante dous anos.
Tras a primeira sentenza, o acusado recorreu, pero a Audiencia desestimou o seu recurso.
A nova resolución recoñece que é certo que a través da expresión que se lle atribúe non se explicita cal é a acción que se pretende levar a cabo sobre as fillas, pero conclúe que é "innegable" que "acórdate ben da cara das túas fillas, que é a última vez que as vas a ver" é unha frase que "ten capacidade suficiente para querer amedrentar á denunciante causándolle a ela un mal- en tanto non volvería a ver ás súas fillas- a través das fillas comúns".