Un proxecto para concienciar os máis novos no coidado do mar e os seus recursos
"A Ría de Marín foi e segue sendo riquísima", afirma o presidente da Asociación Cultural Pesca Deportiva Ría de Marín, Suso Rodríguez.
Para que este entorno se manteña e conserve, hai un ano "un grupo de persoas de Marín, vinculadas durante anos ao mar, a maioría xubilados, outros non", crearon esta asociación.
Con cento cincuenta e tres socios, "dedicámonos á pesca deportiva e, aparte, facemos labor con estudantes, con cursos para coñecer as artes de pesca, como respectar os recursos naturais e tamén damos a coñecer a ría", completa Rodríguez.
Nestas formacións implícanse os socios, de todas as idades e condicións físicas. "Aquí englobamos todo, a xente nova e aos maiores, dende os rapaces de 6 ou 7 anos, os máis pequenos que tivemos na actividade, ata os oitenta e tantos anos, que son os maiores da asociación", destaca Suso Rodríguez.
Estas formacións son totalmente inclusivas e, neste sentido, engade o presidente que na asociación teñen tres socios cunha discapacidade, que "van en silla de rodas e tamén participan nestas actividades".
'Mantemento de entornos e medios mariños' é o título deste proxecto, polo que este ano "pasaron máis de cincocentos escolares, aos que lles demos a coñecer a Ría de Marín e a pesca deportiva".
Nos meses de verán desenvolveuse un novo curso no que participaron nenos e nenas de Marín e Pontevedra, aos que a Asociación levou a pescar para que, despois, recibisen "unhas clases de todo o referente á pesca deportiva", comenta o presidente.
Neste punto, Rodríguez incide no papel que desempeña a divulgación de todo o que implica a pesca deportiva. "Chámase tamén pesca recreativa e a xente pensa que é xuntarnos para pasalo ben, e claro que o pasamos ben, pero tamén nos axustamos a unhas normas que marca a lei, e iso contámosllo aos rapaces", expón.
Por iso, nestes cursos sempre hai un espazo para explicar a cantidade máxima que se pode pescar por día, a tallaxe mínima que hai que cumprir, as vedas en cada tempada do ano ou as especies que está prohibido coller. "É o que nós tentamos inculcar sempre á xente nova, porque son os que veñen agora e dos que depende que se conserven os recursos mariños", apunta Rodríguez.
Tamén lles aprenden sobre os comportamentos de respecto e coidado da contorna. "Dicímoslles que non poden tirar unha botella de plástico ao mar, nin nada que non sexa biodegradable, porque o mar non é unha fonte inagotable e hai que coidalo".
A experiencia nestas clases está sendo moi positiva para o presidente da Asociación Cultural Pesca Deportiva Ría de Marín, quen mostra a súa ledicia e admiración ao comprobar que "os rapaces xa veñen cunha idea ben asentada de que o mar non é un basureiro, como por desgraza pasaba hai uns anos, e saben que non se pode tirar nada".
‘Mantemento de entornos e medios mariños’ é un proxecto beneficiario do Plan Social de Ence. "Para nós a axuda de Ence é importantísima para tirar adiante con todas actividades, porque este é o noso primeiro ano e na asociación partimos de cero. A nosa é unha labor social sen ánimo de lucro, e con esta axuda poderemos seguir dando a coñecer a riqueza da nosa ría e dos recursos do mar, que é algo importantísimo", remata Suso Rodríguez.