Denuncian ante a Inspección "as deplorables condicións de traballo" do Parque de Maquinaria
Por Oskar Viéitez
O sindicato Comisións Obreras presentou este xoves ante a Inspección de Traballo de Pontevedra unha denuncia por "as deplorables condicións de traballo que soportan os traballadores das brigadas do Parque de Maquinaria".
Segundo expuxo o voceiro deste sindicato en Deputación, José Ramón Piñeiro, hai máis de dous anos que a Institución provincial non entrega vestimenta, calzado nin equipos de protección a este persoal encargado da conservación e mantemento das estradas.
Asegura este responsable sindical que como consecuencia diso "se ven obrigados a traballar con roupa e calzado roto", ou a usar material adquirido polo propio persoal que carece das características de protección necesarias.
Por outra parte dende esta central sindical engaden na súa denuncia que "pese a que existe un informe do Servizo de Prevención sobre a necesidade de dotar ao persoal de taquillas, duchas e vestiario, a Deputación tampouco prové a súa existencia, o que obriga ao persoal a cambiarse ao aire libre en plena estrada e a asearse en fontes e no seu defecto, en pozas próximas".
Comisións Obreiras asegura que leva advertindo dende hai máis de tres anos desta situación que "compromete seriamente a seguridade" e que entenden que vulnera a normativa. "Malia as reiteradas advertencias, a Deputación non fixo caso polo que provocou que non se teña outra alternativa que denunciar esta intolerable situación ante a Inspección de Traballo", afirma Piñeiro.
Finalmente, xunto a esta denuncia, os traballadores do Parque de Maquinaria sinalan que dende hai case un ano as brigadas traballan sen camión de bacheo, "portando o material de recheo do firme en capachos manualmente os propios traballadores". Isto provoca que o recheo non asente e "volve producirse a focha co paso doutros vehículos", polo que entenden imprescidible que se dote este servizo dun camión axeitado a estes traballos.