Once espectáculos animarán as rúas do centro histórico de Pontevedra nunha nova edición de Itineranta
Por Redacción
Con dez compañías de artes escénicas e once espectáculos. Así regresará a Pontevedra Itineranta, o festival de espectáculos itinerantes pola rúa. O evento, que chegará á súa décimo terceira edición, celebrarase entre os días 17 e 19 de xullo.
Campi Qui Pugui (Lleida), Produccións Scura (Vila Real), El Carromato (Cádiz), Asaco Producciones (Navalmoral de la Mata), Sound de Secá (Cervera), Troula (Vigo), Xip Xap (Lleida), Markeliñe (Amorebieta), Bambolea (Madrid) e Xarxa Teatre (Vila Real) serán as participantes.
O programa de Itineranta 2024 arrancará o mércores 17 de xullo, ás 19:30 horas, co espectáculo "The Yetis", dos cataláns Campi Qui Pugui, na que unha familia busca fogar acompañados dun sherpa que os guía entre toda a distracción que atopan na cidade.
Ás 20:30 horas sairá Produccións Scura con "ludiNAUTES", unha montaxe de inspiración espacial que recrea a loita contra a invasión das máquinas; e a xornada pecharana os gaditanos El Carromato con "Elipsion" (21:30 horas), protagonizada por seres estraños de carácter futurista.
O xoves 18 será a quenda de "Custodios" con Asaco Producións (19:30 horas), un espectáculo inspirado nos vendedores de rúa; ou "Rats" con Campi Qui Pugui (20:30 horas), na que unha divertida praga de ratas invadirá a cidade de Pontevedra.
Con "Acid" con Sound de Secá (21:30 horas), uns personaxes anárquicos irrompen na rúa cunha festa ambulante; e "Hexagonum" con Troula (22:30 horas), na que unha abella mestra e a súa colmea pon en valor a vida en comunidade e mostra os abusos dos seres humanos.
O último día de Itineranta, o venres 19, sairán polas rúas de Pontevedra os ilerdenses Xip Xap con "Rag & Bone" (19:30 horas), que recupera a figura dos traperos, as persoas que pasaban polas rúas recollendo trapos, botellas ou cartóns.
Os vascos Makeliñe representarán "Andante" (20:30 horas), na que tres personaxes recollen os zapatos perdidos, abandonados e xa deshabitados; e os madrileños Bambolea apostarán por "Aukera" (21:30 horas), un espectáculo visual con auga que une reciclaxe e fantasía.
Os valencianos Xarxa Teatre porán o broche de ouro con "Nit Máxica" (22:30 horas); un espectáculo que traslada ao espectador á festa do lume con pirotecnia, estruturas de outrora, touros con lume, tracas, música en directo e demos.
Relacionadas:
-
Lume e música para despedir o Festival de espectáculos de rúa
Por Oskar Viéitez & Mónica Patxot |
-
Ietis, extraterrestres e esculturas futuristas invaden as rúas de Boa Vila no arranque de Itineranta
Por Oskar Viéitez & Mónica Patxot |
-
Chega Itineranta, un festival para gozar "a través de todos os sentidos"
Por Alejandro Espiño |
-
Pontevedra, ante un "verán que non para" con preto de catrocentas actividades festivas nas súas Festas de Verán
Por Alejandro Espiño & Mónica Patxot |