Reindustrializar Galicia cunha "aposta decidida" pola ciencia e a tecnoloxía, o compromiso de Ana Pontón
Por Alejandro Espiño
No ecuador da campaña electoral, a candidata do BNG á presidencia da Xunta, Ana Pontón, quixo debullar as súas propostas en materia laboral que pasan, en todo caso, por un plan de reindustrialización que realice unha "aposta decidida" pola ciencia e a tecnoloxía.
"Un país sen industria está condenado a ser mero consumidor do que producen outros e carece de futuro", asegurou Pontón, que considera "prioritario" reflotar a industria galega.
Fronte ao "modelo de precariedade", con salarios baixos e peores condicións de traballo que deixa o PP, o BNG aposta pola calidade do emprego e unha economía baseada na ciencia e na innovación, "na que os mozos non se vexan obrigados a emigrar porque aquí non teñen oportunidades" e Galicia sexa capaz de atraer investimentos para crear riqueza e un futuro mellor.
A este respecto, o BNG propón un plan de fomento da actividade tecnolóxica e industrial para aumentar en seis puntos o peso da industria no PIB, ata chegar ao 23% do total, e crear doce mil empregos no período 2024-2030, especialmente en pequenas e medianas empresas.
Para o seu desenvolvemento, Ana Pontón ve fundamental o impulso da ciencia e a innovación e, neste sentido, a candidata avanzou que aumentará o gasto en I+D+i ata o 3% do PIB no 2030.
Pontón advertiu da necesidade de frear a deslocalización de empresas e avogou por facer de Galicia un territorio atractivo para o investimento a través, por exemplo, de máis solo industrial e trámites máis rápidos para que as empresas se poidan instalar aquí.
Ademais, anunciou que co BNG na Xunta as empresas que recibiron axudas públicas nos últimos oito anos e decidan marchar do país estarán obrigadas a devolver eses recursos, "porque non pode ser que os utilicen para o seu beneficio e logo deixen tirados os traballadores do país".
O programa nacionalista inclúe outras medidas como a creación do Innogal, un instituto público destinado a reter talento científico e promover a I+D+i.
Durante esta xornada, Ana Pontón tamén visitou Bueu, onde se comprometeu a apoiar a rexeneración da costa se logra gobernar en Galicia e impulsar proxectos que permitan aproveitar todo o potencial turístico da zona, entre os que destacou as melloras nos accesos ás praias.
Así, Pontón avanzou que un goberno do BNG activará un plan de recuperación e rexeneración das rías que inclúa a limpeza das praias, en colaboración cos concellos, os 365 días do ano.
Respecto da rexeneración do litoral, garantiu que apoiará o proxecto para a rexeneración da praia de Pescadoira e mostrou a súa determinación para mellorar a conservación da illa de Ons, onde prevé modificar a lei para que os residentes recuperen a titularidade das súas vivendas.
Relacionadas:
-
Ana Pontón ve abertas as eleccións cun resultado que dependerá de que os indecisos "collan a papeleta do BNG"
Por Diego Espiño |
-
Luís Bará defende que o BNG "ten proxecto de goberno para devolver a esperanza a Galiza"
Por Redacción |
-
Ana Pontón chama á mocidade a "rebelarse" o 18F "para pelexar e defender un futuro mellor"
Por Diego Espiño |
-
Pontón propón baixar o IVE dos alimentos básicos, libros de texto gratis e un bono transporte para axudar ás familias
Por Alejandro Espiño |
-
O BNG, se goberna, comprométese a desenvolver unha nova lei galega da discapacidade
Por Redacción |
-
Rexenerar as rías galegas, a aposta de Pontón para frear a "perda brutal" na súa produtividade
Por Alejandro Espiño |
-
Pontón promete unha Galicia "que non perda o tren" e teña máis conexións e frecuencias
Por Alejandro Espiño |
-
Ana Pontón, en Pontevedra: "Adiantemos a chegada da primavera coa primeira presidenta do BNG"
Por Oskar Viéitez & Mónica Patxot |