O PP denuncia que un edil do BNG compaxina o soldo do Concello coa actividade privada
Por Redacción
O PP de Pontevedra denuncia que o concelleiro do BNG Miguel Filgueira, o integrante máis recente da lista de 'liberados' da Corporación municipal, "está a compaxinar a súa suposta dedicación exclusiva ás obrigas no Concello coa súa actividade profesional privada".
Os 'populares' emitiron un comunicado no que se refiren a Miguel Filgueira como "beneficiario directo da sorprendente decisión do alcalde Miguel Anxo Fernández Lores de incrementar o custo do goberno municipal cun novo soldo".
Segundo denuncia o partido da oposición, esta participación de Miguel Filgueira na empresa privada puido comprobarse a pasada semana "ao celebrarse un congreso na localidade de Sanxenxo, un encontro dedicado ás cooperativas de ensino, o seu sector profesional, no que apareceu como coordinador do mesmo".
"Aínda que hoxe, quizás pola súa condición de concelleiro con dedicación exclusiva, xa non figura como vicepresidente da Unión de Cooperativas de Ensino de Traballo Asociado de Galicia (Ucetag), nunha comparecencia televisiva do pasado 18 de outubro deu a entender que segue moi activo como representante do sector", sinala o PP.
Así, fan referencia á súa aparición nunhas imaxes recollidas por TVE na que o presentan como coordinador do XV Congreso de Cooperativas de Ensino na que fala en todo momento en primeira persoa do plural.
O PP recorda que xa denunciara no seu día a decisión do alcalde Miguel Anxo Fernández Lores de incrementar as dedicacións exclusivas do BNG coa asignación dun soldo ao novo concelleiro Miguel Filgueira, "cualificándoa de inmoral tanto por executala dun xeito aparentemente solapado como por facela efectiva nun momento de enorme crise económica que está a afectar a practicamente todos os estamentos sociais".