O rugby pontevedrés dá os seus primeiros pasos de cara á tempada 2013-2014
Por Redacción
Acábase o mes de agosto e volve a actividade aos campos de rugby. O primeiro equipo en retomar os adestramentos foi o Pontevedra Rugby Club. O campo de rugby de Monte Porreiro acolleu o pasado martes a primeira sesión dos xogadores senior, sub-20 e sub-18 do conxunto pontevedrés. Un día despois fixérono os sub-16 e os sub-14. Comezan así unha dura pretemporada deseñada polo adestrador do club, Chamy Doval.
Cos xogadores pontevedreses estivo xa o seu novo compañeiro, Chema Fernández que chega do Universidade de Vigo. Nas próximas semanas iranse unindo novos refuerzos para esta tempada na Primeira División Galega co Pontevedra Rugby Club. Aínda que tamén haberá despedidas de xogadores que avanzan nas súas carreiras e enroláronse en equipos de maior categoría.
Moito traballo, suor e esforzo por diante para un equipo que terá o reto de adaptarse á nova categoría e continuar crecendo deportivamente.
O MAREANTES VOLVE AO TRABALLO O LUNS
Algo menos madrugador será o Mareantes Rugby Club. En principio, tamén estreará categoría, no seu caso Primeira Nacional. Despois do merecido descanso físico e mental do verán, chega o momento de preparar a nova tempada. O vindeiro luns 2 de setembro ás 20:30 horas comeza oficialmente a pretemporada para as categorías senior, sub-18 e sub-16. Será, como vén sendo habitual no campo de rugby de Monte Porreiro.
Ao mesmo tempo que arrinca a pretemporada, a directiva do club presentou o novo carnet de simpatizante para a tempada 2013-2014. Ten un prezo de cinco euros e con el, ademais de pasar a formar parte da masa social e colaborar co equipo, obteranse descontos en varios establecementos. Pódese adquirir en todos os eventos, partidos e terceiros tempos do club, así como a través dos xogadores dos diferentes persoais.