Décimo quinto título do mundo para Pedro Campos, gañador da Barcelona ORC World Championship
Por Redacción
Pedro Campos segue a facer historia no mundo da vela. O regatista de Cuntis logrou en Barcelona o seu décimo quinto título mundial e fíxoo á cana do Swan 42 "Movistar". O equipo do Real Club Náutico de Sanxenxo logrou alzarse co ouro da Barcelona ORC World Championship, proba que a embarcación galega dominou practicamente de principio a fin.
Despois tres días no máis alto do caixón -cando a regata costeira os colocou como líderes indiscutibles da proba mundial- os regatistas de Sanxenxo confirmaron este sábado a vitoria converténdose ademais no único equipo español no máis alto da cita mundial. "Un título mundial é un gran xeito de empezar a tempada" afirmaba Pedro Campos nada máis proclamarse campións.
"Estamos encantados porque este foi un dos triunfos máis difíciles por número de competidores, pola calidade dos rivais e por como foron as regatas. Foi moi importante a regularidade que demostramos", afirmou o patrón do Movistar.
O Movistar logrou subir ao podio en sete das oito mangas disputadas, incluíndo a vitoria dos dous tramos da regata longa. Con 17 puntos no seu marcador, Pedro Campos consegue un novo título mundial e nesta ocasión acompáñano no podio o "Pez de Abril" de José María Meseguer e o "Sideracordis" veneciano armado por Pier Vettor Grimani e con Andrea Tedesco á cana.
A clave do triunfo estivo, segundo o galego, en tres puntos: "O primeiro, o traballo de inverno, onde decidimos queriamos que barco usar. Non adestramos nada e coñecemos o barco na primeira regata. En segundo lugar, a regularidade sen dúbida e logo a regata longa, que foi a mellor regata que fixemos pola dificultade, pola lonxitude e pola distancia que lle sacamos os rivais,".
A próxima cita do Movistar será en augas de Valencia, onde o equipo do Real Club Náutico de Sanxenxo disputará o prestixioso Trofeo S.M. La Reina. A proba comezará o próximo venres día 10 de xullo.