España e Francia sub-17 e Arxentina sub-18 dan lustre á XIX Vilagarcía Basket Cup
Por Redacción
A décimo novena edición da Vilagarcía Basket Cup, prevista para a próxima Semana Santa (entre o 16 e o 19 de abril), recuperará o torneo internacional, que adopta a fórmula do triangular con seleccións nacionais.
Así o desvelou a organización, a cargo do Club Baloncesto Vilagarcía, na presentación oficial do evento celebrada este mércores no Pazo Rubiáns.
Alí deuse a coñecer o nome dos equipos participantes: España (sub-17), Francia (sub-17) e Arxentina (sub-18).
Desta forma o recinto feiral de Fexdega acollerá o mércores 16 de abril o encontro entre España e Arxentina, o xoves 17 o Arxentina-Francia e o venres 18 o España-Francia.
Ademais paralelamente desenvolverase a competición das categorías inferiores, coa participación de 114 equipos en idade benxamín, alevín, infantil, cadete e júnior.
Entre a nómina de clubs presentes encóntranse, ademais dos galegos, equipos de Castela-León, Madrid, Asturias e Portugal.