Reparador triunfo do Cisne en Oviedo para reengancharse á pelexa polo play-off (30-33)
Por Diego Espiño
O Club Cisne Balonmán recupera sensacións e posicións na División de Honra Prata co reparador triunfo que logrou este martes na pista do Unión Financeira Oviedo, en partido aprazado da xornada 16 de liga.
O conxunto pontevedrés chegaba sen rede ao encontro, despois de tres derrotas consecutivas (dúas en liga e outra en Copa do Rei) que lle facían afastarse da zona de play-off de ascenso. Con todo os de Jabato lograron repoñerse das adversidades para sumar dous puntos que lles colocan a só un do obxectivo, na sétima posición (25 puntos).
A pesar de todo non comezou ben o encontro, e é que os de Jabato arrincaron tremendamente imprecisos cunha perda ofensiva, un lanzamento fóra e ata dous sete metros fallados nos seus primeiros ataques, circunstancia que os locais aproveitaron para tomar o mando cunha parcial inicial de 2-0. O Cisne tardou de feito máis de sete minutos en estrearse, nunha contra culminada por Mateo Arias.
O bo ton defensivo permitía minimizar danos, igualando Alberto Delgado o marcador (2-2) no minuto 9 de xogo.
O Oviedo con todo seguía levando a iniciativa nun duelo no que defensas e porterías estaban a impoñerse aos ataques. Con diferenzas mínimas o Cisne lograba mandar por primeira vez superado o ecuador do primeiro acto (5-6), entrando nuns minutos de alternacia e igualdade máxima.
Foi así ata o minuto previo ao descanso, no que cun par de golpes á contra xunto a un sete metros parado por Abián o Cisne lograba a súa máxima vantaxe do partido (11-13).
E se acabou ben o primeiro tempo, mellor empezou o segundo para os pupilos de Jabato. Abián Rodríguez detiña os tres primeiros ataques locais e cos goles de Mateo Arias, De Moura e Dani Serrano os pontevedreses abrían por primeira vez unha brecha importante no marcador (11-16) en menos de tres minutos.
Tentaba entón reaccionar o Oviedo, pero a tendencia xa era outra. Agora si as accións ofensivas cisneístas empezaban a fluír contendo os esforzos asturianos por volver engancharse ao partido.
O Unión Financeira pedía tempo morto no minuto 39 cando vía que se lle escapaba o choque (15-21). Os seus xogadores evidenciaban xa certo nerviosisimo, pero chegaban nunha arrancada para reducir a desvantaxe aos dous goles (22-24) a 12 minutos do final.
Tocaba aínda apertar os dentes para asegurar o triunfo, e fíxoo o Cisne primeiro con dous tantos consecutivos que apagaban a rebelión local e despois sen deixar que se achegasen máis que eses dous goles, asegurando dous puntos vitais para o equipo e para pensar que o play-off de ascenso aínda é posible.
Consulta a acta do partido na páxina web da Real Federación Española de Balonmán.
Relacionadas:
-
Solvente triunfo do Cisne para aumentar a confianza (27-31)
Por Almu Dapena |
-
Importante vitoria do Cisne ante o Ibiza para asaltar os postos de play-off (29-24)
Por Almu Dapena & Cristina Saiz |
-
Investigadores da UVigo avalían a evolución física do primeiro equipo do Cisne
Por Redacción |
-
Triunfo balsámico do Cisne en Alcobendas (28-31)
Por Almu Dapena |
-
Cisne e Teucro, a exame ante Alcobendas e Reconquista de Vigo
Por Redacción |
-
O Villa de Aranda complica as aspiracións do Cisne (25-27)
Por Almu Dapena & Cristina Saiz |
-
O Atlético Novás apea o Cisne da Copa do Rei (27-22)
Por Diego Espiño |
-
VÍDEO.- Indignación no Cisne coa decisión arbitral que lles deixou sen un valioso punto en Málaga
Por Diego Espiño |
-
Cruel derrota do Cisne ante o Trops Málaga (29-28)
Por Almu Dapena |