'Cousas de antes', un espectáculo musical para conmemorar os 25 anos da Coral Polifóncia de Campo Lameiro
Por Redacción
Este sábado 14 de maio ás 20.30 horas no Centro Sociocultural Sobrino Buhigas, a Coral Polifónica de Campo Lameiro conmemora os seus 25 anos de existencia coa posta en escena dun espectáculo musical con motivo da celebración das Letras Galegas.
A montaxe leva por título 'Cousas de antes' e a coral contará coa participación do Grupo Cantalúa e a Banda de Gaitas Foula. Será o primeiro achegamento á música folclórica galega por parte desta agrupación que xa contaba no seu repertorio con outras pezas en lingua galega, pero nunca presentara un espectáculo destas características.
O Grupo Cantalúa, formada por intérpretes infantís, participará en varias escenas achegando coreografías musicais mentres que o ritmo tradicional chegará a través de Foula. 'Cousas de antes' ofrece unha recreación de momentos do pasado en forma de pezas instrumentais, partes teatrais, outras cantadas e sempre en clave de humor.
A cada escena, que conta con escenografías e vestiario para reflectir as distintas épocas, vai seguirlle unha canción e o público terá oportunidade de escoitar regueifas, cantos de oficios, desafíos e cantigas de traballo, con ritmos de pandeirada, muiñeira e xota.
Este espectáculo que se atopa apoiado polo Concello de Campo Lameiro e a Deputación de Pontevedra tamén quere unir lazos entre a veciñanza de idades máis avanzadas e a mocidade do municipio establecendo unha conexión a través da lingua e o folclore propio de Galicia.