Quique San Francisco fai rir a Pontevedra co seu humor agudo e gamberro
Por Redacción & Diego Torrado
O Pazo da Cultura volveu a apostar, por segundo sábado consecutivo, polo humor na súa programación cultural de outono. E de novo cun gran éxito de público.
Se a semana pasada foron dous grandes actores galegos, Luís Iglesia e Xosé A. Touriñán, os que triunfaron en Pontevedra, esta vez o que subiu ao seu escenario é un dos cómicos máis coñecidos do panorama nacional, o madrileño Enrique San Francisco.
Centos de pontevedreses encheron o patio de butacas do Pazo para gozar con Una noche con Enrique San Francisco, un espectáculo no que reúne os seus monólogos máis coñecidos.
Sempre na súa liña irónica e canalla, cunha intensa personalidade que nunca deixa indiferente e coa súa inseparable xerra de cervexa, o cómico achegouse en Pontevedra ás situacións máis cotiás desde un humor agudo, intelixente e gamberro que fixo as delicias do público.
Ademais, nesta ocasión Enrique San Francisco estivo acompañado de Denny Horror, un dos cómicos máis solicitados da canle de comedia Comedy Central.