O Festival de Curtametraxes de Bueu recibe preto de 1.500 filmes dun cento de países
Por Redacción
O Festival Internacional de Curtametraxes de Bueu recibiu na súa novena edición 1.461 obras de 97 nacionalidades. As candidatas españolas ascenden a 233, das que 31 son galegas, máis do dobre que o ano pasado, un dato que a organización do FICBUEU relaciona coa recuperación da produción propia.
Alemaña é o seguinte país do que se presentaron máis curtametraxes cun total de 142 seguido por Francia, Estados Unidos, India e Irán. As propostas chegaron desde os cinco continentes, algunhas desde lugares tan afastados como o arquipélago de Antigua e Barbuda.
O prazo de recepción de obras a concurso abriuse no mes de xaneiro e pechouse o pasado 30 de abril.
O próximo 15 de xuño coñeceranse tanto as 20 películas seleccionadas polo xurado que se proxectarán na sección oficial do FICBUEU 2016 como as outras 40 que se verán nas seccións paralelas entre o 10 e o 17 de setembro.