Dez antigos estudantes de Belas Artes achegan ao alumnado da facultade as diferentes fases dun proxecto artístico
Por Redacción
Dez antigos alumnos da Facultade de Belas Artes comparten este luns co estudantado actual as súas experiencias nas diferentes fases de desenvolvemento dun proxecto artístico.
Trátase da terceira edición dunha xornada organizada polo Departamento de Pintura que reúne cada ano o estudantado que o pasado curso superou a materia Proxectos de Debuxo e Pintura, do último curso do grao, con aqueles que a inician nestas semanas para falar desde as ideas descartadas e os primeiros bocexos á formalización dun proxecto para unha materia, para o traballo de fin de grao ou para concorrer a premios ou certames.
Esta actividade está aberta tanto ao alumnado da facultade como a público en xeral.
Víctor Chamorro, Mencía González, Goa Vázquez, Candela Eira, Ainoa Simonns, Daniela García-Caño, Abril Iglesias, Celia Vilariño, Isabela Ferreiro e Isis Huerga son as dez protagonistas dunha iniciativa que se estende ao longo de toda a xornada.
Cada unha delas presenta nas súas intervencións proxectos moi diversos, tanto desde o punto de vista técnico como temático, para logo compartir debate co alumnado.
Relacionadas:
-
O vicepresidente da Deputación reivindica a capacidade organizadora do Museo
Por Redacción |
-
A Universidade de Vigo programa tres concertos no Teatro Principal, gratuítos e abertos a toda a cidadanía
Por Oskar Viéitez |
-
Os artistas Marina Núñez e Manuel Casimiro confirman a súa participación na Bienal
Por Redacción |