Marín celebra o domingo a histórica Danza de Espadas
Por Oskar Viéitez
Marín volverá vivir este domingo 24 de setembro a celebración da festividade do patrón de Marín, San Miguel Arcanxo. Está organizada polo Padroado de Mareantes do Ateneo Santa Cecilia, coa colaboración do Concello.
Veciños e visitantes poderán ver a Danza de Espadas, que os grupos do Ateneo Santa Cecilia e de Meigas e Trasnos escenificarán no transcurso da procesión, sempre aos pés da imaxe de San Miguel.
A Festa de San Miguel e a Danza de Espadas celébranse en Marín desde o ano 1639 como proba de devoción, segundo figura no libro de contas da Confraría de Mareantes da localidade. A súa singularidade, así como o seu arraigamento e valor cultural, foron os criterios que se tiveron en conta á hora do recoñecemento oficial como Festa de Interese Turístico de Galicia por parte da Consellería de Cultura e Turismo, a través da Secretaría Xeral para o Turismo no ano 2010.
A danza de espadas representarase diante do Palco de Musica da Alameda, na Praza de España, onde se queimarán as madamitas, e na praza do reloxo, á beira das esculturas, onde ao finalizar o acto depositarase un ramo de flores, regresando a procesión de novo ao templo antigo. A misa solemne celebrarase ás 12 no templo novo, coa participación do Coro de Cámara Thalassa. Con anterioridade, ás 10.45 horas, terá lugar no Concello o acto oficial do Padroado de Mareantes de San Miguel, coa asistencia da alcaldesa, María Ramallo, a corporación e membros do Padroado.
Tamén no Museo Torres, o sábado 23, terá lugar a inauguración da exposición fotográfica, unha conferencia e un concerto a cargo de Quodlibet, organizada polo Ateneo Santa Cecilia.