Concentración de profesionais dos PAC no Provincial e nos centros de saúde pedindo condicións laborais dignas
Por Anxo Lourido
Por segunda semana consecutiva, profesionais dos Puntos de Atención Continuada (PAC) concentrábanse ante a entrada do Hospital Provincial e en diferentes Centros de Saúde da área sanitaria para reclamar mellores condicións de traballo, previsión por parte da xerencia das xornadas laborais e respecto por parte da directiva da área sanitaria.
Nas últimas horas foron citados por Recursos Humanos para manter un encontro que, probablemente, teña lugar o xoves 28. Neste caso cumpriríase a condición esixida polos traballadores de que a reunión sexa conxunta cun representante de cada un dos PAC da área.
Malia todo, insisten en que deben seguir pelexando polos seus dereitos. María Torre Almón, do PAC de Caldas, afirmaba que recibiron apoio de numerosos centros de Atención Primaria de Galicia e denuncia a incompetencia por parte da xerencia do distrito de Pontevedra e aos seus máximos responsables, o xerente José Ramón Gómez, a directora asistencial Sonia Fernández Arruti e a directora de Atención Primaria, Belén Piñón.
O persoal dos PAC atópase molesto porque estes dirixentes nas súas manifestacións públicas tentan "desvalorizar" e están "a acosar" aos traballadores. Lembran ao xerente que os médicos dos PAC non traballan no "límite baixo" recollido no acordo do 2008, senón que cumpren "con fartura" as súas horas anuais. Segundo expón Irene Pardo, doutora no PAC de Bueu, todos os profesionais médicos superaron no calendario deste ano as 1.600 horas cando o máximo establecido no acordo sitúase en 1.451.
Lamentan a improvisación organizativa por parte da xerencia para cubrir as vacacións e as baixas. Ademais afirman que tras a concentración da semana anterior recibiron seis obrigatoriedades con cinco días de antelación para despois anular dúas. Esta situación consideran que se debe a esa falta de organización que implica o emprego das obrigatoriedades para coberturas de ausencias que son coñecidas con moita antelación. Piden que as extensións de xornada sexan excepcionais e non "a norma a seguir". "Se espremes ao teu traballador para que faga horas a maiores tes que darlle unha solución. Non se trata de facer horas, horas e horas", afirma José Pardavila, médico no PAC da Parda.
Tamén queren tratar coa dirección nesa reunión a falta de fidelización da xerencia cos residentes formados na área. Expoñen que a sobrecarga horaria e o abuso provoca un éxodo deste persoal recentemente formado, de maneira que en Atención Primaria só permaneceron tres dos últimos trece residentes e dous deles comunicaron na última semana o seu malestar pola situación laboral na que se atopan. Sinalan que se están incumprindo os descansos de doce horas entre quendas laborais.
Desta forma, a través destas concentracións, manteñen a demanda de que se realicen calendarios consensuados co persoal e equitativos.
Relacionadas:
-
O Sergas agarda que "non se repitan" as incidencias que deixaron un só médico de garda no PAC da Parda con 106 pacientes
Por Mónica Patxot & Anxo Lourido |
-
Carbón para a Xerencia da área sanitaria, petición do persoal dos PAC aos Reis Magos
Por Redacción |
-
Persoal dos PAC levará unha carta de demandas aos Reis Magos e deixará carbón á Xerencia no Hospital Provincial
Por Anxo Lourido |
-
"O Sergas quérenos así", de xeonllos e traballando 48 horas seguidas
Por María José Pita |
-
Isidro Lago, presidente do Colexio de Médicos: "Pasamos de héroes a villanos, véase lo que está pasando con la Atención Primaria"
Por Redacción |
-
Apoio do goberno local á manifestación convocada por SOS Sanidade Pública para reclamar recursos en Atención Primaria
Por Mónica Patxot & Anxo Lourido |
-
A área sanitaria recoñece que carece de persoal suficiente para cubrir as demandas dos médicos dos PAC
Por Anxo Lourido |
-
Celadores do distrito sanitario de Pontevedra denuncian que a xerencia abusa dos contratos temporais dun día
Por Mónica Patxot & Anxo Lourido |
-
Protesta do persoal dos nove PAC da área sanitaria polas quendas impostas: "no hay cuerpo que lo aguante"
Por Anxo Lourido |
-
Anuncian a reforma de dez centros de saúde na área sanitaria antes de que finalice 2021
Por Redacción |