Multan a Cespa con 9.000 euros por non aclarar a súa política de contratación en Pontevedra
Por Alejandro Espiño
Tras a investigación policial e xudicial no marco da Operación Patos, que acabou cunha causa aberta contra o Concello de Pontevedra por presuntas irregularidades na contratación de traballadores na empresa Cespa, o propio goberno municipal iniciou unha investigación interna para coñecer os criterios de selección de persoal da empresa. E este mércores coñeceuse a resolución dese traballo.
Arquivada a causa pola xustiza, ao non apreciar delito nos supostos enchufes detectados -e que foron negados desde o principio polos membros do goberno do BNG-, a Xunta de Goberno acordou sancionar a empresa con 9.010 euros por non informar sobre a súa política de contratación, como así llo solicitara o Concello.
A sanción é por dúas faltas graves pola reiterada non comparecencia da empresa para dar conta desta política de contratación.
O expediente abriuse o pasado 7 de outubro de 2015 e acordouse unha primeira convocatoria da empresa ante o xuíz instrutor -o concelleiro de Réxime Interior e Persoal, Vicente García Legísima- o 29 de outubro. Naquela ocasión a empresa non compareceu e remitiu ao Concello un escrito de alegacións. O Concello reiterou a solicitude de comparecencia para o 4 de novembro, que tampouco tivo resultado por parte da empresa.
O expediente seguiu o seu curso seguindo o procedemento habitual cunha proposta de resolución que tamén tivo alegacións por parte da empresa e que finalmente foi aprobada na Xunta de Goberno de hoxe.
Así, se acorda impoñer a Cespa dúas multas: unha de 3.000 euros por unha falta grave pola non comparecencia do 29 de outubro; e unha segunda de 6.010,12 euros por unha falta grave pola non comparecencia do 4 de novembro. O expediente queda pechado tras negarse a empresa a dar información sobre a súa política de contratación ao estar o asunto sub iudice.
Este expediente pode ser recorrido pola empresa no Xulgado Contencioso.
O portavoz do goberno, Raimundo González asegurou que dende aquela data as relacións coa empresa concesionaria da recollida do lixo son tensas, aínda que se teñen que manter nos termos contractuais.
Relacionadas:
-
O Concello, sobre o arquivo do caso Cespa: "Non estarían de máis" as desculpas do PP
Por Alejandro Espiño |
-
Carpetazo xudicial aos enchufes en Cespa: a xustiza non aprecia delito e arquiva a causa
Por Alejandro Espiño |
-
Ameazan cunha folga na recollida de lixo ante o bloqueo na negociación do convenio colectivo
Por Oskar Viéitez |
-
Expedientan a Cespa por non comparecer ante o Concello para informar sobre as contratacións
Por Natalia Puga |
-
O xuíz sobresé de forma provisional a causa dos supostos "enchufes" en Cespa
Por Redacción | Creada e actualizada
-
O Concello nega "rotundamente" estar relacionado con enchufes nas contratacións de Cespa
Por Alejandro Espiño |