O Consello da Xunta aprobou este luns someter a información pública o proxecto de mellora da accesibilidade e conectividade de 27 paradas de autobús situadas en dez concellos.
Esta actuación nas contornas de Pontevedra, do Salnés e de Tabeirós, suporá un investimento que rolda os 635.000 euros.
Actuarase no ámbito das rutas de acceso polo norte á cidade de Pontevedra ao paso polos concellos da Lama, Barro, Campo Lameiro, Catoira, Ponte Caldelas, Moraña, Vilagarcía de Arousa, Vilanova de Arousa, A Estrada e Forcarei
As intervencións consisten na dotación de marquesiñas, na mellora da accesibilidade con ramplas e información en braille e no incremento da visibilidade e iluminación.
A Xunta tamén deu conta este luns da aprobación dos trámites de información pública e do informe das administracións afectadas para o citado proxecto.
O proxecto someterase nas vindeiras semanas a información pública, con efectos expropiatorios, co obxectivo de poder licitar e executar as obras ao longo do ano 2025.
A Xunta ten previsto investir arredor de 35 millóns de euros para a mellora de 1.100 paradas en toda Galicia.