A Xunta sacou a licitación este venres a redacción dos Proxectos de Interese Autonómico (PIA) para o desenvolvemento de solo residencial para as primeiras 15.000 vivendas previstas en toda Galicia na Estratexia Galega de Solo Residencial.
Entre os municipios que forman parte desta iniciativa está Pontevedra, onde a Consellería de Vivenda prevé habilitar solo para 2.040 vivendas en dúas parcelas en San Mauro.
Trátase dun ámbito de 20,4 hectáreas de superficie que no contrato figura co nome de Lote 6: Concello de Pontevedra: SB2-Fase II (zona San Mauro) e SB5 (Sector Este-Estrada San Mauro).
Segundo explicou a conselleira de Vivenda e Planificación de Infraestruturas, María Martínez Allegue, estas parcelas foron elixidas en negociacións co Concello de Pontevedra.
Estes espazos sen desenvolver serán xestionados polo Instituto Galego de Vivenda e Solo (IGVS).
A previsión da administración autonómica é ter adxudicados os contratos de redacción dos proxectos ao longo do próximo 2025, a fin de aprobar os PIA en xullo de 2026.
Entre ese ano e 2027 daríase o seguinte paso que será o proceso de expropiacións.
A folla de ruta da Consellería de Vivenda apunta que os proxectos de urbanización redactaranse entre febreiro e novembro de 2026 e, finalmente, as obras de urbanización comezarán en 2028.