Non hai ningún municipio da área sanitaria de Pontevedra e O Salnés que teña unha incidencia superior aos 500 casos por cada 100.000 habitantes. Mellorou a situación epidemiolóxica de Catoira, o único que superaba ese nivel, que obrigou a manter as súas actuais restricións.
Xunto a este municipio, Ponte Caldelas, Soutomaior e Vilaboa son os que teñen unha incidencia máis alta, a 23 febreiro, ao superar os 400 neste indicador a 14 días.
Con respecto aos casos activos, Ponte Caldelas conta a día de hoxe con 26 contaxiados (un menos); mentres que Soutomaior ten 45 (tres menos).
Tras eles están Meis, Marín (114 casos, dous menos), Cerdedo-Cotobade, Cuntis (17 casos, dous menos), Vilanova de Arousa (42 casos, sen cambios), A Lama (7 casos, dous menos) ou Meaño (22 casos, un menos).
Os máis próximos de todos eles en baixar dese limiar dos 250 son Cambados, que rexistra unha subida dos casos activos con tres máis, 47 en total; e Barro.
Pontevedra, que baixou ata unha incidencia acumulada de 200 casos por cada 100.000 habitantes, presenta ademais un descenso notable nos casos activos por covid-19. Hai na cidade un total de 209 persoas coa infección activa. Son dezasete menos que onte.
Nun nivel similar atópanse Poio (62 casos, oito menos), Sanxenxo (59 casos, tres menos), Ribadumia (10 casos, un menos) ou Moraña (9 casos, un menos).
Pola súa banda, non hai cambios en Bueu, que repite un día máis con 28 casos activos; nin en Campo Lameiro, que ten catro.
Xa son, por último, catro os municipios da área sanitaria cunha incidencia inferior aos 150 casos por cada 100.000 habitantes: O Grove, Caldas de Reis, Portas e Forcarei.
A incidencia acumulada a 14 días de cada municipio, a partir dos datos proporcionados polo Servizo Galego de Saúde, pode consultarse no mapa que acompaña a esta información.