A conselleira de Vivenda e Planificación de Infraestruturas, María Martínez Allegue, asistiu este xoves como convidada especial ao comida – coloquio organizado polo Foro Empresa Pontevedra na sede do Liceo Casino.
A conselleira pronunciou unha conferencia co título "Construír, habitar, conectar" e aproveitou para facer repaso dalgúns proxectos que a Xunta de Galicia ten en marcha no concello de Pontevedra.
Así, o primeiro asunto no que puxo o foco foi nas 74 vivendas de promoción pública que a súa Consellería ten "en proceso de construción" na cidade. "Temos tamén xa a piques de adxudicar a redacción do proxecto tras a licitación, que teño que dicir que se presentaron 33 ofertas, para dous novos edificios en Valdecorvos" que albergarán 104 novas vivendas de promoción pública.
María Martínez Allegue tamén informou que na súa consellería están "á espera" de que se materialice a cesión da parcela municipal á Xunta de Galicia, "que permitirá 58 novas vivendas de promoción pública", co que "serán máis de cincocentas as vivendas protexidas que teremos no barrio de Valdecorvos", das cales 358 serán de promoción pública e o resto están adxudicadas principalmente a cooperativistas.
A conselleira Martínez Allegue destacou que "Valdecorvos é a construción que queremos para a vivenda protexida en Galicia: moderna, sostible e accesible"
"E aínda hai máis", continuou a conselleira citando a cesión se chan urbano á Xunta "que estamos a piques de finalizar" en colaboración co Concello de Pontevedra en dúas zonas, Tafisa e A Devesa.
Igualmente, Martínez Allegue fixo referencia á Estratexia Galega de Só Residencial "que temos xa encargados os estudos da súa viabilidade que tamén serán unha realidade ao longo desta lexislatura e que permitirán 2.000 vivendas protexidas máis nesta cidade de Pontevedra".
En materia de infraestruturas, a conselleira citou algún dos proxectos en marcha como as obras de mellora de seguridade da estrada PO-531, ao paso pola parroquia de Campañó. A Xunta recibiu 10 ofertas para executar esta reforma que supoñerá un investimento total de 862.000 euros. A consellería prevé comezar estas obras na próxima primavera e desenvolvelas nun prazo de execución de 8 meses.
ANTONIO GARAMENDI
Neste mesmo salón de actos do Liceo Casino está previsto que este venres 27 de setembro a Asociación de Empresarios de Pontevedra (AEMPE) organice un encontro no que estará como invitado Antonio Garamendi, presidente da Confederación española de organizacións empresariais (CEOE).