Zona Franca e Suelo Empresarial del Atlántico (SEA), as dúas entidades que xunto co Concello de Cuntis, impulsan o proxecto de urbanización para a primeira fase do polígono industrial da Ran, prevén iniciar as obras este mesmo ano.
Así o destacaron os delegados técnicos de ambos os consorcios na reunión que mantiveron este mércores coas empresas que están instaladas no polígono e co alcalde de Cuntis, Manuel Campos, para presentarlles esta actuación.
O documento, redactado por Tragsa, contempla o desenvolvemento e a transformación urbanística dun ámbito de 325.635 metros cadrados, dos que algo máis de 200.000 metros cadrados son superficie industrial.
O resto, até completar o espazo, estará destinado a zonas verdes, equipamentos, prazas de aparcadoiro e sistemas viarios.
O investimento roldará os 13 millóns de euros, financiados ao 50% pola Zona Franca de Vigo e a SEA, tal e como figura no convenio asinado co Concello de Cuntis.
Os técnicos xa están a ultimar ademais a tramitación para concretar a participación que deberá ter cada empresa instalada no polígono para proporcionarlles seguridade fronte ás normativas actuais e garantir a súa continuidade empresarial.
Manuel Campos, pola súa banda, confirmou os contactos co Concello dun bo número de empresas da comarca interesadas en implantarse neste novo ámbito estratéxico, onde se constituirá un verdadeiro ecosistema empresarial.
Os prezos de comercialización para o solo transformado roldarán os 85 euros por metro cadrado, segundo avanzaron os seus responsables nesta reunión.
O proxecto de expropiación foise desenvolvendo de maneira paralela ao de urbanización. Os terreos afectados son das comunidades de montes de Meira, Transponte, A Cova e Guldrigáns, restando unha pequena bolsa de solo de particulares.
Zona Franca e SEA destacan que se cumprirá así o seu compromiso de nutrir a Cuntis de solo industrial, dando resposta a unha demanda histórica de toda a zona co obxectivo de impulsar a economía e a creación de novos postos de traballo.