Nada máis deixar de soar as notas do valse co que as debutantes e os seus padriños abrían o baile de Gala, chegaba o momento do resto de asistentes, dispostos a gozar dunha longa unha magnífica noite de festa, ata ben entrado o amencer.
Esta cita estival, que é un punto de encontro tradicional para numerosos socios, familias e acompañantes, así como amigos e socios pertencentes ás Sociedades de Intercambio coas que o Liceo Casino ten convenio, supérase a si mesma cada ano e este non ía ser unha excepción, con preto de 6.000 persoas (cifra pendente do reconto oficial da organización), dispostas a gozar dunha noite na que as estrelas e a calor acompañaron para dar maior brillantez ao evento.
Foron moitos os que aproveitaron un privilexiado balcón para presenciar a sesión de fogos de artificio que marcaban o inicio das festas, mentres comezaban os primeiros saúdos e brindes con amigos e coñecidos, moitos dos cales danse cita unha vez ao ano, coincidindo co seu regreso á cidade para gozar das súas vacacións, do baile de gala e das festas da Peregrina.
Coma se dun desfile de moda se tratase, cheo de glamour, con abundancia de brillos, abelorios, plumas, gasas e escotes pronunciados, especialmente nas costas, todo en medida longa cubrindo os nocellos, tal e como esixe o protocolo para elas, os homes lucían os seus smokings e uniformes de gala, sufrindo e facendo fronte a unha noite especialmente calorosa, que non impediu a ninguén vivir unhas horas para o recordo.