Para o Goberno a construción dunha nova comisaría provincial para a Policía Nacional en Pontevedra é "absolutamente prioritaria". O é, segundo o subdelegado do Goberno, Abel Losada, porque a da Boa Vila é a que está nunha situación "máis deficitaria" en Galicia.
E entre as opcións que se barallan hai unha que destaca xa por encima de todas. É a posibilidade de que esta nova comisaría ocupe a actual Casa do Mar de Mollavao, que o Servizo Galego de Saúde abandonará cando estea terminado o Gran Montecelo.
O traslado do centro de especialidades ao complexo hospitalario deixará sen uso este inmoble, que é propiedade do Instituto Social da Mariña, polo que a cesión a outro departamento do Estado, neste caso a Dirección Xeral de Policía, sería relativamente sinxelo.
Losada explicou que o Goberno pediu aos servizos urbanísticos do Concello unha información preliminar sobre a situación na que se atopa este solar que "sen dúbida tería que adecuarse aos condicionantes de seguridade e de accesibilidade".
O subdelegado considera "prematuro" dar por feito de que a nova comisaría ocupará o espazo da actual Casa do Mar, xa que en primeiro lugar será a propia Policía Nacional a que teña que "avalar a súa idoneidade" para acoller estas dependencias.
A este respecto, Losada advertiu que se trata dun tema "delicado e certamente complexo", polo que pediu abordar este asunto con "lealdade institucional" e coa "necesaria discreción" para poder validar canto antes esta posible localización.
Este interese do Goberno no inmoble da Casa do Mar transcendeu por boca do edil responsable da área municipal de infraestruturas, César Mosquera, que lembrou que o Concello xa consultara co Instituto Social da Mariña para estudar posibles usos.
Para Mosquera "casan moi ben" as dúas situacións que se dan con respecto a este proxecto, a necesidade "latente" de que Pontevedra teña unha nova comisaría e a "preocupación" que existía por buscar outros inquilinos para que a Casa do Mar non se deteriorase.
A parcela onde está este equipamento conta con 2.054 metros cadrados "e só está construída a terceira parte, máis ou menos", ao redor duns 700 metros por planta, segundo o concelleiro do BNG, polo que existen "moitísimas posibilidades" para poder aumentalo.
"Está moi ben comunicada", destacou César Mosquera, que considera que "non habería absolutamente ningún problema" para situar alí a nova comisaría, que podería chegar a duplicar o espazo edificado nas actuais dependencias policiais.
O Concello, que sondara este emprazamento para agrupar nel todos os seus servizos de emerxencias, entre eles a Policía Local e os Bombeiros, defende que "hai outras posibilidades" para este equipamento que se desvelarán "nas próximas semanas".