A I Feira da Saúde e o Benestar de Pontevedra, PonteSan, converteu a praza de España nun escaparate do traballo das asociacións socio comunitarias que traballan na cidade do Lérez co que, ao mesmo tempo, quéreselles dar visibilidade e recoñecer o seu labor diario con enfermos e familiares. Postos informativos, charlas, talleres, probas e valoracións médicas e actividades deportivas achegan aos pontevedreses este sábado e este domingo toda a filosofía e o labor social dos colectivos.
O tenente de alcalde e concelleiro de Deportes, Actividade Física e Saúde de Pontevedra, Tino Fernández, inaugurou o evento este sábado e destacou que se desenvolverá durante toda a fin de semana entre estritas medidas de seguridade, á vez que pediu a todos os participantes e asistentes que extremen as precaucións, pois "os tempos non son bos".
Fernández insistiu en que "a saúde é o máis importante que temos, como non teñamos saúde, non temos nada" e que, tras a atención de sanitaria propiamente dita, sempre resulta reconfortante saber que se pode botar unha man a "esoutro tecido" que, fóra da administración sanitaria, "é capaz de animarnos, de axudarnos, de entendernos". Trátase das asociacións socio sanitarias ás que esta feira quere dar visibilidade.
Para o tenente de alcalde, estas asociacións formadas por persoas que viven, viviron unha enfermidade directamente ou no seu círculo familiar e que deciden unirse para prestar axuda fan "un traballo absolutamente impagable". Asegura dicilo porque o comprobou de primeira man e porque sabe que "ás veces é un traballo escuro e pouco recoñecido, pouco valorado", por iso é polo que desde o Concello de Pontevedra quixesen darlle ese recoñecemento.
PonteSan busca contribuír a que "ese esforzo enorme" que fan día a día eses colectivos teña "visibilidade e recoñecemento" e tamén axudar a fortalecer as súas estruturas facendo que ese traballo sexa recoñecido polo maior número de persoas posibles, tanto de Pontevedra como doutras localidades.
As estritas medidas de seguridade establecidas impiden que haxa ao mesmo tempo máis de 150 persoas na carpa da praza de España, obrigan a que todos os participantes utilicen máscara e xel hidroalcólico, establecen controis de temperatura e aforo e obrigan a manter distancias de seguridade. A pesar do estrito, non impiden que se desenvolvan actividades divulgativas e, ao mesmo tempo, entretidas, como os bailes ou talleres de percusión aos que este sábado sumáronse os políticos participantes na inauguración (pódense ver no vídeo que acompaña esta información).
A I Feira da Saúde e o Benestar permanece aberta este sábado en horario de mañá e tarde ata as 20.00 horas e este domingo en horario de mañá de 10.30 a 14.00 horas e ofrece unha completa programación que este sábado xa profundou na convivencia coa Covid-19, a prevención do Alzhéimer ou a realidade das persoas xordas.
Ademais, un Showcooking de cociña saudable a cargo de Ketty Fresneda, finalista de Masterchef 2018 e propietaria do restaurante Kutún de Pontevedra, animou a xornada matinal.
A sesión inaugural tamén contou coa participación do deputado provincial Carlos López Font, en representación da Deputación Provincial de Pontevedra, que fixo un chamamento a toda a cidadanía a que "cumpramos as normas" establecidas para frear a pandemia da Covid-19 e opinou que unha feira das características de PonteSan "é o mellor que se podería facer neste momento".
"Hai que facer eventos como leste. Hai que facelos dentro da total seguridade sanitaria e de todo tipo, pero é verdade que temos que facer eventos como este que sirvan de pedagoxía", valorou López Font, que insistiu en que "é imposible pensar nun momento máis idóneo para levar a cabo esta feira".
A subdelegada do Goberno en Pontevedra, Maica Larriba, en representación da Administración Xeral do Estado, quixo reafirmar o compromiso do Goberno central e da súa propia Subdelegación "coa saúde", máxime nun momento como o actual, e coas asociacións que traballan neste ámbito.
Tras lembrar que das case un millón de máscaras repartidas polo Goberno de España na provincia desde o inicio da pandemia case 200.000 entregáronse a organizacións socio sanitarias, Larriba insistiu na necesidade de estar á beira das persoas máis vulnerables nestes momentos, tanto por cuestións de saúde como económicas.
Consulta aquí o programa completo da I Feria de Salud y del Bienestar de Pontevedra 'PonteSan'.