Desde hai anos, o acceso á praia das Catedrais realízase mediante cita previa. Quen queira visitar este espectacular areal lucense debe facer unha reserva e, ao chegar, mostrar a súa autorización aos vixiantes. Este sistema é que propuxo a Xunta para regular a asistencia ás praias galegas ante a crise sanitaria do coronavirus.
O primeiro verán desta 'nova normalidade', que sen dúbida virá acompañado de numerosos cambios no noso comportamento social, prevé introducir este sistema, polo menos nas praias máis concorridas e sempre que o soliciten os concellos, aos que o goberno galego ofreceu a súa plataforma tecnolóxica.
Pero a súa non é, nin de lonxe, a única solución que hai no mercado. Unha das máis recentes e novidosas ten selo pontevedrés.
A empresa Edigal, asentada no polígono do Campiño e con máis de 25 anos de experiencia, deseñou unha plataforma e unha APP para dispositivos móbiles que permite regular o acceso ás praias con cita previa.
A idea, explicou a PontevedraViva o xerente de Edigal, Iago Martínez, xorde dunha "unión entre cidadanía e empresa" en pleno estado de alarma e nela traballaron máis dunha trintena de persoas.
Por mor dunhas conversacións con profesionais turísticos, todos cunha ampla experiencia no sector, comezaron a pensar nunha solución tecnolóxica que facilitase que a apertura de espazos públicos e negocios se realizara cunha maior seguridade.
"Nós xa tiñamos plataformas que xestionan cousas parecidas", sinala Iago Martínez, polo que "nos animamos a investir" neste sistema que, a día de hoxe, "xa está montado e ao dispor das administracións", polo que a súa aplicación "podería ser inmediata".
Ese foi a orixe desta ferramenta informática que, seguindo un sistema similar a plataformas como Booking ou El Tenedor, permite visualizar a dispoñibilidade das praias, reservar día e duración da estancia, controlar o acceso e rexistrar o aforo dos areais en tempo real mediante a xeolocalización do usuario.
Ademais, permite introducir medidas para garantir o distanciamento social, para limitar o aforo ou para regular a estancia nas praias por un tempo limitado.
Unha vez que o usuario se dá de alta na plataforma, o sistema permite seleccionar a praia que queremos visitar e o día no que iremos. Ademais, se o areal ten moitas reservas a aplicación mostrará a dispoñibilidade de praias próximas con menor número de aforo. O acceso controlaríase mediante entradas establecidas e cun código QR.
O sistema, aclara o xerente da empresa pontevedresa, é gratuíto para o cidadán, xa que os custos da plataforma corren a cargo da administración. As reservas pódense realizar a través da APP, desde unha web, por teléfono ou en sitios físicos habilitados, co obxectivo de que "ninguén quede fóra" por non ter un dispositivo móbil.
Esta solución, ademais, non só está pensada para controlar o acceso a praias. "Admite calquera tipo de negocio", aclara Iago Martínez, de forma que tamén poida ser empregada para realizar reservas en lugares de lecer, hoteis, restaurantes ou establecementos comerciais.
"A idea é que se, por exemplo, vas ir ao Grove poidas ter unha visión clara da praia á que podes ir, onde poderás comer ou reservar cita para cortar o pelo", sinala o empresario, que anima aos concellos a apostar por este sistema porque a situación deste verán "vai ser complicada" polos ecos do coronavirus.