Coincidindo coa celebración do Ramadán este 28 de febreiro, o centro asociado da UNED en Pontevedra abre o prazo de matrícula para participar nun curso que busca loitar contra a islamofobia.
Baixo o título 'Superando a islamofobia a través do diálogo e o coñecemento', este curso desenvolvésese os días 28 e 29 de marzo online, en directo ou en diferido.
O curso está orientado, principalmente, a estudantes, educadores, investigadores e calquera persoa interesada no fenómeno da islamofobia, así como nos mecanismos de inclusión social, o diálogo interreligioso e o impacto psicolóxico da discriminación.
Entre os seus obxectivos están analizar o fenómeno da islamofobia desde unha perspectiva multidisciplinaria, comprendendo as súas causas, consecuencias e o seu impacto na sociedade; e explorar o papel do diálogo interreligioso como ferramenta para superar a discriminación e promover a convivencia pacífica entre diferentes comunidades culturais e relixiosas.
Tamén busca proporcionar estratexias teóricas e prácticas para abordar a islamofobia e fomentar a inclusión social, tanto a nivel individual como colectivo e desenvolver comprensión da doutrina musulmá e dos mitos que alimentan a islamofobia, co fin de contribuír á educación e sensibilización sobre este fenómeno.
O curso está dirixido por María Luisa Mondolfi, doutora e licenciada en Psicoloxía e profesora-titora do centro asociado da UNED.
A coordinación depende directamente de Rafael Cotelo Pazos, responsable do departamento de Extensión Universitaria e Actividades Culturais da UNED en Pontevedra; e estará moderado por Aarón Argudo Palacios, doutor en Neurociencia e Psicoloxía Clínica pola Universidade de Santiago de Compostela e profesor-titor UNED con Venia Docendi.
Como relatores do curso figuran Manuel Corullón Fernández, licenciado en Estudos Árabes e Islamística; Aicha Fernández Marín, graduada en Arqueoloxía e Antropoloxía e guía oficial de turismo especializada no legado andalusí; Omneia Sadek O-Shahat, psicóloga; e Sherine Samy Gamaleldin, doutora en Tradución e interpretación pola Universidade de Granada e profesora contratada interina na Universidade de Vigo.
Rafael Cotelo manifestou que con este curso a UNED pretende achegar o seu granito de area para "facilitar unha convivencia pacífica e tranquila" á vez que facilitan un espazo para o encontro entre ambas as culturas. "Debemos fomentar e estimular un esforzo de integración de ida e volta non só pola nosa banda sinó tamén por parte dos que recibimos", mantén.