Non foi un incendio de grandes dimensións, pero si provocou momentos de tensión pola súa proximidade ao asentamento de chabolas.
Efectivos de extinción da Xunta, Emerxencias Sanxenxo e Bombeiros de Pontevedra tiveron que acudir de madrugada a un lume declarado na parte alta do Vao, pegado á estrada que transcorre ata Campañó.
O incendio iniciouse ao redor das 23:30 horas nunha zona de maleza e chea de cascallos, segundo explicaron os bombeiros.
A súa proximidade ao poboado fixo que nuns minutos todos os seus habitantes abandonasen o lugar.
Pasado o momento de maior perigo, cara á 1:00 da madrugada os Bombeiros de Pontevedra regresaron á súa base, pero permaneceron no lugar durante varias horas máis unha brigada de Medio Rural e efectivos de Emerxencias Sanxenxo.
Trátase do segundo incendio que afecta nos últimos días ao Vao, tras o declarado no Vao de Abaixo na madrugada do pasado mércores.