Un incendio nunha das salas do pavillón municipal de Campo Lameiro calcinou gran parte do material que almacenaba a comparsa "Os Solfamidas".
As lapas levaron os traxes de edicións anteriores, todos os seus instrumentos de percusión e o material co que estaban a confeccionar os seus vestidos para o Entroido deste ano.
Esta perda pon en serio perigo a participación desta histórica comparsa no entroido pontevedrés.
O suceso tivo lugar na madrugada do sábado ao domingo, na noite de Reis. O lume orixinouse nun Belén do pavillón de Campo Lameiro tras un fallo eléctrico da decoración. O lume fixo rebentar un depósito de auga das caldeiras do pavillón que sufocou as lapas.
Os máis de 80 integrantes de "Os Solfamidas" levaban traballando desde agosto nos traxes para este ano.