Un home de 60 anos, novena vítima mortal da covid nos últimos cinco días en Pontevedra

Pontevedra
11 de decembro 2020

Trátase da vítima número 69 da área sanitaria Pontevedra - O Salnés. Xunto a este home faleceron outras nove persoas nas últimas horas en Galicia como consecuencia da pandemia. Segundo a Consellería de Sanidade, todas contaban con historias clínicas nos que figuraban enfermidades previas

Unha ambulancia entra na área de Urxencias do Hospital Montecelo
Unha ambulancia entra na área de Urxencias do Hospital Montecelo / Mónica Patxot

Nova xornada lutuosa en Galicia debido á pandemia da covid-19. A Consellería de Sanidade notificaba este venres 11 de decembro o falecemento de 10 persoas diagnosticadas por coronavirus na comunidade autónoma.

Entre elas atópase un home de tan só 60 anos, que perdía a vida no Hospital Montecelo do Complexo Hospitalario Universitario de Pontevedra. Desde o luns 7 todos os días rexistrouse unha ou máis vítimas acadando as 9 mortes por covid nos últimos cinco días na área sanitaria de Pontevedra - O Salnés, que suma xa 69 persoas falecidas desde que comezaban a rexistrarse as vítimas da pandemia.

Ademais do falecido en Pontevedra capital, tamén morrían outros catro pacientes durante as últimas 24 horas na provincia: un home de 89 anos no Hospital Álvaro Cunqueiro de Vigo, procedente da Residencia  Doral de Mos; unha muller de 97 anos no centro integrado Boullosa Pardo de Beira de Vigo, procedente da residencia CRAPD de Vigo II; dúas mulleres, de 97 e 82 anos na residencia Vila  do Conde de Gondomar. 

Fóra da provincia tamén se sumaban unha muller de 94 anos no Centro integrado CEGADI, procedente da Vivenda comunitaria de Castrelo de Miño; dúas mulleres, de 65 e 88 anos ,no Complexo Hospitalario Universitario da Coruña; en leste mesmo centro hospitalario perdía a vida un home de 87 anos. Por último, outra muller, de 94 anos de idade, morría no Complexo hospitalario de Ourense. Todas as vítimas rexistradas nas últimas horas contaban con historiais clínicos nos que figuraban enfermidades previas.

Con esta nova cifra, Galicia sitúase xa en 1.303 persoas falecidas por covid-19 desde o inicio da pandemia.