Ás 20.40 horas deste mércores 1 de febreiro cumprirase un ano dun momento que será difícil de esquecer no centro de Pontevedra. A esa hora empezaba a saír fume do edificio situado no número 12 da rúa Michelena e o número 6 dos Soportais da Ferrería, un incendio cuxo dramático desenlace quedou xa marcado na memoria dos pontevedreses. E, por se alguén o esquece, tan só ten que darse un paseo pola céntrica praza, pois o inmoble segue sen rehabilitar doce meses despois e ata este martes, día previo ao primeiro aniversario, non comezaron os labores de limpeza da fachada.
A Ferrería ten desde hai un ano unha cicatriz imposible de disimular, pero se a alguén non se lle esquece é aos afectados máis directos, os propietarios do edificio incendiado e os que están pegados por ambos os lados e os responsables dos negocios instalados nos mesmos. Así, arrasou este inmoble do século XIX e destruíu para sempre a zapatería Cuplé, o estudo de fotografía de Tere Malvar e o emblemático comercio A Moda Ideal, situado nos Soportais da Ferrería desde 1896.
Outro negocio que non se viu obrigado a pechar, pero que segue padecendo os danos é a pizzeria Dolce Vita, situado no baixo do edificio contiguo. Perla Barone, encargada da mesma, asegura que os prexuízos continúan a día de hoxe. Este martes, cando comezaron as tarefas de limpeza, sen ir máis lonxe, a auga coa que chorreaban a fachada alcanzoulle o seu local e víronse obrigados a tirar toda a pizza que tiñan no mostrador e limpalo. E durante todo o verán "non se vendeu pizza" porque tiña moi pouca visibilidade do negocio porque o inmoble contiguo estaba precintado e tapado.
No caso deste negocio, a compañía aseguradora que tiña contratada fíxose cargo dalgúns dos danos ocasionados, pero un ano despois segue sen reparar o cristal do escaparate, pois non llo cobre e as dúas compañías aseguradoras da Moda Ideal e Cuplé, os dous negocios nos que puido empezar o incendio, aínda non se puxeron de acordo sobre quen debe facerse cargo dos danos e non ten aínda a quen reclamarlle que o repare.
Respecto diso, cabe apuntar que un ano despois do incendio máis virulento dos que se lembran en Pontevedra desde o que arrasou a igrexa de San Francisco, aínda non se determinou onde comezou o lume que obrigou a desaloxar a nove persoas, unha delas de avanzada idade con problemas de mobilidade que vivía nun edificio contiguo ao sinistrado, e deixou danos en vivendas e oficinas próximas.
O estado de ruína no que quedou a estrutura complicou a investigación das orixes do lume, na que participaron axentes da Comisaría Xeral da Policía Científica desprazados desde Madrid, e o seu rebo, que tardou meses en estar finalizado.
A cicatriz mantense no tempo e agora a esperanza de volver ver a emblemática praza da Ferrería en todo o seu esplendor queda supeditada a que os propietarios acometan as tarefas de rehabilitación. Hai apenas unha senana, houbo operarios no edificio realizando tarefas de apontoamento, pero non se sabe cando se rehabilitará.
De feito, este martes foi o primeiro día en que volveu á praza a imaxe que foi habitual no edificio mentres duraron as tarefas de rebo, con valos e cintas impedindo o paso aos transeúntes para permitir que os operarios traballasen. Nesta ocasión, en principio, só limparán a fachada, pero o traballo é suficiente para que se prolonguen durante varias xornadas ou mesmo semanas.