AAsociación Socio Sanitaria Educativa Inflamatoria Intestinal (ASEII) conta cun dos stands máis visitados en PonteSán, a Feira da Saúde e Benestar de Pontevedra, con iniciativas innovadoras para concienciar e apoiar a pacientes con enfermidades inflamatorias intestinais.
María García Cardoner, enfermeira nutricionista e nai dunha paciente con enfermidade de Crohn, explica o funcionamento de 'Tres en caca', unha adaptación educativa do clásico tres en raia.
O taboleiro inclúe a escala de Bristol e representacións de feces, permitindo aos xogadores aprender sobre a saúde dixestiva de maneira lúdica.
O xogo permite aprender que as feces vermellas indican que existe algunha hemorraxia; as de cor branca que existe algunha patoloxía; mentres que as marróns son as normais.
García Cardoner explica que tamén presenta camisetas informativas da asociación que amosan o significado ampliado das cores das deposicións coa intención de informar.
Na área sanitaria de Pontevedra existen máis de setecentos casos de persoas coa enfermidade de Crohn, pero hai numerosos pacientes con colite ulcerosa e outras patoloxías.
Os pacientes que, tras unha intervención cirúrxica intestinal, vense obrigados a portar unha bolsa recolectora de colostomía coa necesidade de acudir varias veces ao baño ao longo do día.
Por ese motivo, ASEEII continúa coa iniciativa de 'Apadriñar un váter' co obxectivo de facilitar o acceso a baños en calquera punto xeográfico para persoas ostomizadas.
Os locais adheridos reciben unha pegatina identificativa, e os pacientes obteñen un carné que lles permite acudir a estes baños en situacións de necesidade.
Víctor Loira, paciente de Crohn, afirma que cando se ve obrigado a acudir a un establecemento con urxencia: "o primeiro que vexo é o baño. Non me importa se hai bo café ou mal café. Vexo como está o baño de limpo".
En PonteSán, a asociación tamén ofrece un espazo para que unha empresa externa amose uns novidosos servizos para persoas con enfermidades intestinais con aseos de ostomías en dúas versións: os que se poden instalar en vivendas particulares e outros para establecementos, lugares de lecer ou festivales de asistencia masiva de público.
Loira indica que o custo da instalación nunha vivenda ronda os 800 euros.
Explica o avance que supón estes baños adaptados: "no meu caso que baleiro a bolsa vinte veces ao día nun baño normal son vinte veces que teño que agacharme todos os días nunha mala postura. Se non estás afeito, os xeonllos sofren. Con estes baños novos evitas as malas posturas".
APP GRATUÍTA
Alberto Ruibal Ojea presenta na feira a actualización da súa exitosa aplicación 'Asistente en Crohn', dispoñible gratuitamente en Google Play Store e iOS.
"Serve, por exemplo, para a sintomatoloxía ou detección de brotes, porque a aplicación é capaz de detectar brotes dunha inflamación a tempo para evitar un ingreso en urxencias ou complicacións graves", explica o mozo autor desta ferramenta dixital.
Cunha media mensual de 300 usuarios novos e mil descargas, Ruibal busca agora financiamento institucional para manter a gratuidade do servizo.
Estas iniciativas reflicten o compromiso de ASEII en mellorar a calidade de vida das persoas con enfermidades inflamatorias intestinais, combinando educación, tecnoloxía e apoio práctico.
A Feira da Saúde e Benestar, que organizan na Praza de España a concellería de Benestar Social coa CEDDD Galicia, finaliza este sábado 28 nunha edición na que apostou por fomentar a educación na saúde unindo á actividade asociativa, coa participación tamén de clubs deportivos, coa sanitaria.
PonteSán, durante estas dúas xornadas, busca promover os hábitos de vida saudables fomentando o deporte e sensibilizando á cidadanía sobre as distintas enfermidades.