Os toques de leghón regresan o sábado cunha nova edición da Aña Urbana

Pontevedra
31 de marzo 2025
Actualizado: 12:57

A asociación cultural Trépia e o Concello promoven unha programación especial este 5 de abril a partir das 11.30 horas. Sitúa Pontevedra como "referente da música e do baile galego"

Presentación da Aña Urbana 2025
Presentación da Aña Urbana 2025 / Mónica Patxot

Pontevedra volverá ser esta fin de semana "referente dentro da música e do baile galego" coa celebración dunha nova edición da Aña Urbana organizada polo Concello e a asociación cultural Trépia. 

 O concelleiro de Cultura, Demetrio Gómez, e integrantes de Trépia presentaron este luns a programación especial, que se celebrará o sábado 5 de abril

Artesanía, xantares, roteiros, exhibicións de bailes e rituais tradicionais e os clásicos toques de leghón serán os protagonistas da xornada, que terá como epicentro a Praza do Concello. 

Esta festa popular durará toda a xornada, desde a apertura da carpa ás 11.30 horas ata o peche da programación á unha da madrugada.

"Volveremos ter unha festa alegre, a través da música tradicional", destacou o concelleiro, para engadir que no Concello están "encantados e encantadas de que poidamos contar con esta actividade, de ver Pontevedra como un referente".

Destacou tamén que ver toda esta celebración nunha contorna urbana "achega cor e orixinalidade a esta festa".

Na carpa haberá postos de xantares, artesáns e actividades varias e a partir das 12.00 horas comezará un roteiro dos grupos participantes polas rúas e prazas do centro histórico. 

A partir das 14.00 horas será a hora do xantar e a partir das 16.00 horas chegarán os Cantos de Tabera

Tamén os máis pequenos serán os protagonistas cunha festa infantil a partir das 17.00 horas da man de Polo Correo do Vento.

Ás 18.00 horas será o momento das actuacións dos grupos da escola Trépia e a música seguirá a partir das 21.00 horas co concerto de Lagharteiras.

A última actividade da festa será un Serán programado a partir das 22.30 horas