O campus de Pontevedra acollerá entre o 21 e o 25 de abril a Semana CREA 2025, unha iniciativa aberta á cidadanía que, baixo o lema "Pensarnos futuros sustentables", servirá como escaparate da creatividade e a innovación promovidas polo Campus de Especialización Crea.
Co apoio da Deputación de Pontevedra, esta edición contará con destacadas personalidades como o recoñecido publicista Toni Segarra, a deseñadora de moda Elisa Palomino ou o artista gráfico Bruno de Almeida.
A programación abordará temas como a moda sustentable, a creación con materiais reciclados e o deseño colaborativo, distribuídos en conferencias, obradoiros prácticos e un ciclo de cine.
Segundo Ana Belén Fernández Souto, directora do Campus Crea, o obxectivo é mostrar a creatividade "dun xeito interdisciplinar", reforzando a súa conexión coa sustentabilidade.
CONFERENCIAS
Martes 22: Elisa Palomino (University of Arts de Londres), con máis de 25 anos de experiencia en firmas como Dior e John Galliano, falará sobre moda e antropoloxía.
Mércores 23: O artista Carlos Rodríguez-Méndez (Universidade de Salamanca) ofrecerá unha charla na Facultade de Belas Artes, mentres o Museo de Pontevedra acollerá un debate sobre deseño e inclusión coas deseñadoras gráficas Raquel Boo e Zeltia Iglesias, xunto coa profesora Silvia García.
Xoves 24: Toni Segarra, considerado o mellor creativo español do século XX, e David Caballero (VML The Cocktail) dialogarán sobre publicidade nun coloquio moderado por Julián Abad (Creatividade Galega). A cita será tamén no Museo de Pontevedra.
Venres 25: Manuel Heredia (Sods Estudio) abordará as claves para negocios téxtiles sustentables na Facultade de Deseño.
OBRADOIROS PRÁCTICOS
Entre as actividades destacan catro obradoiros gratuítos, con inscrición aberta ata cubrir prazas (xes.crea@uvigo.gal):
"Crea o teu propio libro bordado" (Luns 21 e Mércores 23), con Maritza Berttollini.
"Deseño colaborativo e sustentabilidade" (Martes 22), impartido por Bruno de Almeida.
"Materiais sustentables: tradición vs. greenwashing" (Martes 22), con Elisa Palomino.
"Las hierbas que él arrojó" (Martes 22 a Venres 25), un taller de arte con refugallos que culminará nunha exposición.
CICLO DE CINEMA
A Vicerreitoría retoma o ciclo cinematográfico 'Sobre Vivir (II)', que explora a relación entre o ser humano e o medio ambiente, con proxeccións como:
4 de abril: Animal (Cyril Dion, 2021), sobre cambio climático.
25 de abril: A noite é nosa (James Gray, 2007).
30 de maio: Alguén voou sobre o niño do cuco (Milos Forman, 1975).
Todo o programa figura na ligazón do DUVI.