Un incendio forestal declarado pouco antes das 22.30 horas da noite deste luns calcinou varios terreos agrícolas da parroquia pontevedresa de Marcón, e provocou o susto entre os veciños ao aproximarse a uns 100 metros das casas.
Testemuñas presenciais indicaron que as lapas xurdiron nunha zona situada entre os lugares de Pintos e Sabarís, un punto de difícil acceso no que os veciños sosteñen que o inicio do lume non puido ser fortuito.
O primeiro punto no que os veciños deron lume e alertaron ao servizo de extinción de incendios 085 estaba moi próximo ás vivendas do Río, en Pintos, e as lapas alcanzaron varios metros de altura.
Uns 70 veciños saíron das súas casas e dirixíronse ao punto do lume, algúns alertados porta a porta e outros a través dun grupo veciñal de whatsapp. Unha decena deles comezaron a sufocar as chamas valéndose de pas de tal forma que impediron o seu avance cara ás vivendas, pero o incendio se propagou cara a terreos e matogueiras.
Unha motobomba e unha brigada forestal da Consellería de Medio Rural atallaron as chamas dende dous flancos distintos e sobre as 23.30, unha hora despois de que os veciños visen as primeiras chamas, estaba controlado. Sobre as 00.00 horas xa só quedaban rescaldos e os veciños puideron regresar ás súas casas, pero os brigadistas continuaron o seu labor e un profesional continuou na zona durante a madrugada.