Na avenida de Porteliña atopábanse xa algunhas das agrupacións que tiñan previsto participar no gran desfile do Entroido de Poio con indumentarias e material. Pero ao redor das 16.00 horas, un vehículo con megafonía anunciaba a suspensión deste percorrido de disfraces. Minutos máis tarde, a Policía Local confirmaba esta suspensión.
A previsión meteorolóxica de forte vento e choivas para a tarde deste domingo obrigou á concellería de Cultura e Festas a adoptar esta determinación, malia ter agardado ata practicamente o último momento coa esperanza de que o tempo mellorase.
Está previsto que este gran desfile se aprace para outra xornada pero desde o goberno local de Poio aínda non fixeron pública a data para a nova convocatoria.