O goberno local de Soutomaior manifestou nas últimas horas o seu apoio á manifestación convocada pola plataforma cidadá Queremos Galego, que terá lugar o próximo 23 de febreiro en Santiago de Compostela.
O alcalde Manuel Lourenzo recibiu o coordinador comarcal da plataforma, Diego Bará, e á portavoz María Obelleiro, quen destacaron a importancia desta mobilización para reivindicar o galego como "lingua vital" en todos os ámbitos da sociedade.
A manifestación, baixo o lema "Lingua vital xa!", partirá da Alameda de Santiago ás 12.00 horas, coincidindo coa celebración do Día de Rosalía.
O obxectivo é reclamar aos poderes públicos que garantan e promovan o uso do galego en todos os espazos, tanto públicos como privados, e concienciar á cidadanía sobre a necesidade de afrontar a emerxencia lingüística que vive a lingua.
O encontro en Soutomaior enmárcase nunha serie de reunións que a plataforma está a manter nas últimas semanas con representantes institucionais.
Xa o pasado 11 de febreiro, Bará e Obelleiro foron recibidos polo alcalde de Pontevedra, Miguel Anxo Fernández Lores, e polo concelleiro de Normalización Lingüística, Demetrio Gómez.
Ademais, o 23 de xaneiro celebrouse un plenario comarcal no que se sentaron as bases para os actos previos á gran mobilización convocada para este domingo.
Para facilitar a participación, Queremos Galego puxo á disposición da cidadanía autobuses que partirán desde distintos puntos de Galicia. As rutas e horarios está dispoñible na páxina web da plataforma.
Co apoio de Soutomaior, suman xa varios concellos e institucións da contorna que respaldan esta iniciativa, como os gobernos locais nacionalistas de Pontevedra e de Barro, coa idea de trasladar a preocupación polo futuro do idioma.