Nos dez primeiros días deste ano 2019 xa se rexistraron en Galicia 21 denuncias por violencia de xénero, sete delas na provincia de Pontevedra, unha cifra que contribúe a reafirma a preocupación do Goberno por esta realidade social e que este xoves levou ao delegado do Goberno en Galicia, Javier Losada, a defender a importancia de seguir mantendo a Lei de Violencia de Xénero e defendendo o seu labor.
Losada e a subdelegada do Goberno en Pontevedra, Maica Larriba, compareceron para facer balance dos sete primeiros meses do Executivo de Predro Sánchez no que afecta á provincia e detívose a analizar a situación da violencia de xénero. "Estamos a falar de temas de importancia", insistiu, e achegou cifras que o confirman: no ano 2018 houbo 5.000 denuncias en Galicia, das cales 1.773 foron na provincia de Pontevedra.
Esa preocupación de Losada é, segundo indicou, maior "polo acordo que tomou onte o PP con Vox, polo acordo de darlle ás a Vox por parte do PP e Cidadáns", pois considera que se trata dun problema real e "calquera cousa que se poña en dúbida como o está poñendo o PP dándolle ás a Vox, débenos preocupar como sociedade".
Losada fai unha defensa férrea da actual lexislación porque "as leis son para salvar vidas e a lei de violencia de xénero salvou moitas vítimas" e engade que "non pode haber ningún tipo de relaxo" e, sobre todo, non pode haber ningún tipo de comportamento encamiñado a "trasladar dúbidas acerca de se a lei de violencia de xénero foi favorable". Na súa opinión, "foi moi moi favorable".
En resposta ás posturas de Vox en relación con esta lei, que piden que se derrogue, o delegado do Goberno defende que a violencia de xénero é unha realidade, "non é ningún invento do feminismo radical nin do feminismo supremacista" -termos cos que o partido que lidera Santiago Abascal refírense ao movemento feminista-.
"É unha problema de dereitos da muller, é un problema de democracia paritaria, é un problema de dereitos fundamentais", argumenta, e engade que a lei de violencia de xénero incide na defensa dos dereitos das mulleres e "o que non o entenda así está a lle facer fraco favor á metade da poboación española".