"Amigo dos meus amigos, pero sobre todo sobriño dos meus tíos" reza a biografía do noso entrevistado no seu perfil de Instagram, e o certo é que podo dar boa fe diso pois teño a sorte de coñecer a gran parte da súa tan ampla como marabillosa familia. David Amor, máis aló de desbordar talento para a comedia e a interpretación, é un home bo, xusto e comprometido tanto coas persoas como coa contorna que o rodea
Ademais, deben saber que David é o verdadeiro primeiro ser indómito, pois el foi o protagonista da primeira entrevista que fixen, a modo de tarefa escolar, cando o que escribe tiña apenas 8 anos. Desde entón, obviamente, cambiaron moitas cousas, pero os bos valores seguen presentes.
- Dime unha pregunta que non sexa do teu gusto.
Que que opino dos límites do humor.
- Como te definirías?
Optimista, cacarelo, anfitrión e melancólico.
- De Pontevedra de sempre?
Non, de adopción que creo que ten máis mérito. O bonito é escoller un sitio sen ser teu. Teño amor verdadeiro por esta cidade.
- Como é a túa relación con Pontevedra?
De amor total. Sempre a recomendo. Deume moitas cousas. Aquí estudei o bacharelato e desde entón…
- Onde estás situado: xeración baby-boom, xeración X ou xeración millenial?
Creo que son fluído, navego entre todas, consciente ou inconscientemente.
- Cales dirías que son as características da túa xeración?
Creo que é egoísta. Pretendemos que o mundo vire arredor de nós. Acomodamos o mundo aos nosos desexos.
- A quen votaches nas túas primeiras eleccións?
Pois non lembro o partido exacto, pero a un de esquerdas seguro.
- Como cambiou o sector artístico desde que empezaches?
Cambiou moito e a peor. Por exemplo, antes había moitas máis salas nas que poder actuar. Agora só quedan teatros e espazos das administracións. Está a acomodarse.
- Que proxectos tes agora entre mans?
Pois estamos de xira con Go Home, unha obra de teatro moi especial, con toques de humor e que trata un tema de profunda actualidade como o turismo e que faremos o próximo día 25 en Vigo.
- Algún proxecto que aínda por inalcanzable que pareza gustaríache desenvolver?
Ser protagonista nalgunha película
- Algún xénero en particular?
Ningún, o malo desta profesión é que se elixes ti acabas facendo sempre o mesmo.
- Que reto pendente cres ti que ten Pontevedra?
Que a xente entenda que é parte do proxecto. Facer nos arredores o moito que fixeron no centro. Agora mesmo estou involucrado nun proxecto na Fracha que non vou deixar ata que o consiga, relativo a unhas pistas para practicar ciclismo na montaña.
- A clase política está á altura da sociedade?
É o fiel reflexo da sociedade e a sociedade é corrupta. Empezando por cruzar o paso de peóns cando o semáforo está en vermello. Todos coñecemos algún caso de corrupción.
- Que consello daríaslle ao teu "eu" dos 20 anos?
Compra Bitcoins.
- Un ano sen ir a misa ou un ano sen ir de festa?
Sen ir a misa.
- Que é a amizade?
O mellor. É a cousa máis barata e que máis enche. Sentir a amizade de alguén é a felicidade plena.
- Dime unha canción que che emocione.
Calquera de Xabier Díaz.
- Que hai despois da vida?
Abono.
- O último capricho que te deches?
Pois o gofre con nata que me estou tomando agora mesmo contigo.
- Cando dixeches por última vez "quérote"?
Xa hai tempo… mínimo hai un mes.
- E por último, a quen gustarías de ver nesta sección?
Ao meu amigo Roi Estévez.
Para David, Pontevedra sabe a croquetas, cheira a pedras, é de cor marrón e soa a paz. Definitivamente, David Amor sente Pontevedra.
O CUESTIONARIO
− Nunca saio de casa sen… comprobar se pechei a porta con chave.
− Na miña neveira sempre hai… auga con gas e queixo fresco.
− No meu armario destaca… a desorde.
− A idade é…. o paso do tempo.
− Sempre fun o ollo dereito de… ninguén, ou iso espero. Debe ser moi incómodo.
− Pontevedra ten alma de… funcionario.
− Creo en… a xente
− O ano que marcou a miña vida foi… 1996, cando me ficharon para a Selección Española de Balonmán.
− O mellor agasallo que me poden facer é… tempo
− O meu lugar no mundo é… molestar o menos posible.
− Se non puidese vivir en Pontevedra viviría en… unha aldea remota.
− O meu momento favorito do día é… cando me meto en cama.
− Pontevedra… humanidade.