As obras da primeira fase do proxecto do Gran Montecelo, que consistirán na construción dun novo edificio hospitalario anexo ao actual, espertaron o interese de moitas empresas. A Xunta recibiu ata seis ofertas para executar estes traballos, orzados en case 130 millóns de euros.
Cinco destas ofertas, aclaran desde o goberno galego, están conformadas por unións temporais de empresas (UTE), que agrupan a dezaseis compañías.
Nas próximas semanas, os técnicos analizarán as propostas presentadas para elixir a mellor para executar estes traballos que, segundo as previsións da Xunta, comezarán en xuño.
Os orzamentos da Xunta para 2021 recollen unha partida de 13,5 millóns de euros para poder iniciar a ampliación do hospital pontevedrés.
Esta primeira fase do Gran Montecelo, que ten un prazo de execución de 42 meses, consistirá na construción dun novo edificio hospitalario cunha superficie de preto de 92.000 metros cadrados distribuídos en 10 andares.
O novo edificio, que ocupará unha superficie superior os 12.500 metros cadrados, estará composto por un primeiro volume distribuído en dúas edificacións, que actuará como base dun segundo que albergará as áreas de hospitalización.
Concretamente, construirase unha zona de base, que estará distribuída en dous edificios de cinco plantas. No dianteiro estarán as consultas externas que engloban, entre outros servizos, hematoloxía, medicina preventiva, cardioloxía ou dixestivo; e no traseiro estarán as urxencias, o bloque cirúrxico, a UCI e a UCI pediátrica ou os laboratorios, entre outros.
Sobre esa zona de base, segundo consta no proxecto inicial, elevarase un terceiro bloque que se corresponde co edificio de hospitalización con ingreso.
Nunha segunda fase das obras reformarase o edificio hospitalario actual, para posteriormente executar o aparcadoiro cuberto, cun investimento de 25 millóns de euros.
Este inmoble estará unido ao novo edificio e centralizará toda a atención ambulatoria, aproveitando os investimentos realizados nos últimos anos para adecualas aos servizos de cirurxía maior ambulatoria, cirurxía de curta estancia, un hospital de día e diversas consultas.
Con esta ampliación, destacan desde o goberno galego, os profesionais desenvolverán o seu traballo nun único edificio, cunha única porta de Urxencias, sen interferir na actividade asistencial do antigo edificio, co que posteriormente se realizará a conexión.
O Gran Montecelo, que atende as necesidades asistenciais de 26 concellos e os seus máis de 300.000 habitantes, quedará cuberto así para os próximos 50 anos.