Segue o pulso entre o Concello de Pontevedra e os donos das atraccións de feira. A poxa pola que o goberno municipal licitou os postos para as festas de Santiaguiño do Burgo e a Peregrina non gustou a parte do sector e ameazan non só con boicotealas senón tamén con acudir á vía xudicial para resolver as súas diferenzas.
Nun comunicado remitido aos medios, o colectivo reclama de novo unha entrevista coa concelleira de Festas, Carme da Silva, para trasladarlle unha serie de cuestións que, segundo a súa formulación, non están debidamente realizadas neste proceso de poxa.
A pesar de que quedaron vacantes moitos dos postos ofertados, este colectivo segue disposto a non instalarse nas festas de Pontevedra.
Todo iso porque entenden que durante o proceso non rexeron os principios de transparencia e igualdade, especialmente porque a apertura de sobres coas ofertas realizouse de forma privada.
Ademais, cuestionan o criterio seguido para fixar o prezo do metro cadrado e a medición das prazas que se licitaron, ao asegurar que algunha se adxudicou a atraccións máis grandes que o tamaño das mesmas. Esta cuestión pode ocasionar, aseguran, problemas de seguridade.
Os empresarios conclúen que non descartan acudir á vía xudicial "en defensa da transparencia e igualdade no proceso administrativo de licitación pública".