A sede pontevedresa da Tesourería da Seguridade Social (TGSS) na rúa Arcebispo Malvar estará en obras durante seis meses.
Trátase dunhas de obras de mellora para a renovación integral dos falsos teitos e a instalación dun novo sistema de extinción de incendios e non afectará ao seu funcionamento.
Estímase que poderían estar rematadas entre finais deste ano e comezos do próximo.
As actuacións, valoradas en 213.347 euros, están en proceso de licitación.
O subdelegado do Goberno en Pontevedra, Abel Losada, visitou este venres a sede acompañado polo director provincial da TGSS, Juan Herrera. Ademais de falar co persoal, anunciou a realización destas obras.
A oficina da avenida de Arcebispo Malvar, de 2.300 metros cadrados, atende a un área de 200.000 persoas que comprenden os municipios de Pontevedra, A Lama, Cambados, Cerdedo-Cotobade, Marín, Meaño, Meis, O Grove, Poio, Ponte Caldelas, Ribadumia e Sanxenxo e ten 30 traballadores.
Dentro da organización interna da Seguridade Social, parte do seu persoal recibe tamén carga de traballo procedente doutras provincias, fundamentalmente Madrid e Barcelona.
Ao longo do ano atende unhas 10.000 persoas en formato presencial e unhas 3.000 telefonicamente.
Tamén realiza máis de 15.000 trámites online CASIA (soporte integral da TGSS) e preto de 3.000 trámites solicitados a través da aplicación da Seguridade Social IMPORTASS.
Por volume de traballo, trátase da segunda sede en importancia da provincia, por detrás da sede da dirección provincial en Vigo.