A explosión de contaxios que se rexistra na área sanitaria de Pontevedra e O Salnés desde San Xoán, pasando dos 128 casos activos ao 24 de xuño ao 1.285 -dez veces máis- que hai este xoves, espertou todas as alarmas das autoridades.
Cada vez son máis os municipios que superan os índices de risco. Actualmente, catro están en nivel alto: A Illa, Vilagarcía, Vilanova e Cambados; mentres que outros cinco, Pontevedra, Poio, Marín, Caldas de Reis e Sanxenxo están en nivel medio de restricións.
Pero é, sen dúbida, este último o que peor evolución rexistra. Os casos activos en Sanxenxo son xa 121 (24 máis que onte), o que situou a incidencia acumulada a 14 días en 666 casos por cada 100.000 habitantes.
A situación é aínda peor se se analiza a incidencia a 7 días. Neste parámetro, Sanxenxo alcanza os 614 casos por cada 100.000 habitantes. É, de longo, o dato máis elevado de toda a área sanitaria, moi por diante dos municipios en risco alto.
A Illa, cunha incidencia a 14 días de 851 -a 7 días baixa xa a 283- e 47 casos activos (dous máis), encabeza a listaxe, seguida de Cambados (102 casos, dez máis), que ten unha incidencia de 706 casos a 14 días e de 459 a 7 días.
Preocupa tamén a evolución en Poio, que suma 105 infectados (dez máis), e ten unha incidencia a 14 e 7 días de 579 e 462 casos por cada 100.000 habitantes, respectivamente.
Os outros dous municipios en nivel alto, Vilagarcía de Arousa e Vilanova de Arousa, teñen 185 (oito máis) e 60 casos activos (nove máis), respectivamente, mentres que a súa incidencia a 14 días sitúase en 537 (Vilanova) e 457 (Vilagarcía).
Pontevedra, pola súa banda, ten unha incidencia de 366 a 14 días e de 279 a 7 días, que se traduce nos 327 casos activos que ten a cidade este xoves. Son 40 máis que onte.
Pola súa banda, aumenta tamén o número de infectados en Marín, con 85 casos (16 máis); Bueu, con 33 (cinco máis); Meaño, con 23 (tres máis); Ribadumia, con 16 (tres máis); Cuntis, con 12 (dous máis); ou Moraña, con 9 (un máis).
A tendencia contraria rexístrase en Ponte Caldelas, con 10 casos activos (un menos).