O Concello de Sanxenxo e a Sociedade Española de Ornitoloxía manteñen conversacións co obxectivo de establecer unha colaboración estreita para a conservación e a divulgación das aves e a biodiversidade do complexo intermareal e a Rede Natura 2000.
Un espazo que abarca desde o istmo da Lanzada ao litoral da ría de Arousa, que inclúe un dos 9 humidais máis importantes de España, protexido polo convenio Ramsar, un selecto club do que forman parte máis dun milleiro de humidais no mundo.
Sanxenxo vai destinar 700.000 euros dos fondos europeos Next Generation para a conversión da Telleira nun centro de interpretación do complexo intermareal no litoral da ría de Arousa. Trátase dun obxectivo prioritario para o Concello a posta en valor desta zona, a súa conservación e a práctica do turismo ornitolóxico e de natureza. SEO Birdlife é o mellor socio posible para conseguir estes obxectivos. É a ONG decana de España, creada en 1954, e ten como prioridade a educación ambiental e especialmente a conservación das aves silvestres e o seu hábitat.
A idea é que SEO Pontevedra estableza a súa sede no Centro de Interpretación A Telleira para contribuír á posta en valor da zona e para colaborar na divulgación dos seus valores ambientais, de maneira que veciños e visitantes póidanse beneficiar do seu coñecemento da zona. Outra liña de posible colaboración é a presentación xunto con outras comunidades autónomas como Canarias, Andalucía, Asturias e SEO/ Birdlife, a unha convocatoria do “Proxecto Experiencia Turismo de España” para a posta en valor da singularidade das aves atlánticas a través dun roteiro de carreiros sostibles, dixitalizados e accesibles.
O consorcio formado polas comunidades podería aspirar a axudas de dous millóns de euros, dos que 200.000 euros destinaríanse a Sanxenxo.
Aves e natureza, xunto ao patrimonio ( Musealización Castro da Lanzada) e a gastronomía (Centro da Cultura Gastronómica no Pazo Quintáns), forman o tridente sobre o cal Sanxenxo quere impulsar o seu crecemento como destino turístico os 365 días do ano.